DÍLI, STLTIMORLESTE.com – Tribunal Judisiál Primeira Instánsia Dili (TJPID) aplika medida apresentasaun periódika ba arguidu na’in tolu iha kazu Beto.
Tribunal Judisiál Primeira Instánsia Dili deside aplika medida koasaun apresentasaun periódika ba arguidu na’in tolu, ne’ebé Ministériu Públiku akuza ho krime obstrusaun ba autoridade públika no danu agravadu.
Desizaun ne’e tuir pedidu Ministériu Públiku, ne’ebé reprezenta husi prokuradór Bartolomeo de Araujo, durante audiénsia iha Tribunal Judisiál Primeira Instánsia Dili.
Prokuradór husu tribunal atu aplika medida apresentasaun periódika ba arguidu na’in tolu. Defeza mós konkorda ho pedidu Ministériu Públiku nian.
“Defeza konkorda ho pedidu Ministériu Públiku atu aplika medida apresentasaun periódika ba arguidu na’in tolu,” dehan defensor públiku Jermano Guterres Ramos ba STL, iha Kaikoli, 30/10/2026.
Ho medida ne’e, arguidu na’in tolu tenke aprezenta an iha Ministériu Públiku dala rua durante fulan ida.
Antes ne’e, autoridade seguransa detein arguidu na’in tolu iha loron 27/10/2026, iha área Beto, hafoin akontese konfrontu entre grupu joven sira.
Durante prosesu audiénsia, arguidu sira lori ba tribunal ho roupa detidu. Prosesu ne’e prezide husi juíza Ersília de Jesus.
Ministériu Públiku reprezenta husi prokuradór Bartolomeo de Araujo, enkuantu arguidu sira hetan asisténsia jurídika husi defensor públiku Jermano Guterres Ramos.
(ter)
