DÍLI, STLTIMORLESTE.com – Diresaun Nasionál Seguransa Rodoviária (DNSR) hamutuk ho PNTL hala’o operasaun kontrolu viatura iha Dili, atu hametin seguransa no prevene infrasaun tráfiku.
Tuir Diretor Nasionál Seguransa Rodoviária, Elder Soares, hateten katak operasaun ne’e foka ba viatura sira ne’ebé viola Kódigu Estrada, liuliu kona-ba estacionamento no kondusaun iha fatin ne’ebé proibidu.
“Operasaun ne’e atu kontrola mikroléte sira ne’ebé para iha kurva dalan atu hatún pasajeiru, no motorizada sira ne’ebé para iha trotuar ka ponte,” hatete Diretor Nasionál Seguransa Rodoviária, Elder Soares ba jornalista sira iha Becora, Mota Ulun, Sesta-feira (30/10/2026).
Nia esplika katak, hahalok hirak-ne’e bele hamosu risku ba seguransa utilizadór estrada sira.
Operasaun ne’e mós fiskaliza dokumentu viatura no ekipamentu obrigatóriu ne’ebé motorista tenke kumpre molok uza estrada públika.
“Motorista sira tenke asegura dokumentu kompletu, xapa matríkula, lampu, espellu no kapasete ba utilizadór motorizada,” nia hatutan.
Elder Soares dehan katak, operasaun ne’e objetivu atu aumenta konsiénsia no responsabilidade motorista sira bainhira kondús, hodi prevene asidente no hamenus infrasaun tráfiku.
Durante operasaun, ekipa Seksaun Tránzitu Munisípiu Dili foti medida hasoru motorista sira ne’ebé komete infrasaun.
Motorista sira ne’ebé la kumpre rekizitu legál tenke regulariza sira-nia situasaun tuir prosedimentu ne’ebé aplika.
DNSR no PNTL sei kontinua hala’o operasaun pasa revista regularmente ba transporte públiku, privadu no viatura governu nian iha kapitál Dili.
Operasaun ne’e mós parte hosi kampaña edukasaun no sensibilizasaun públika kona-ba importánsia respeita Kódigu Estrada, uza ekipamentu seguru no kumpre regra tráfiku.
(jen)
