DÍLI, STLTIMORLESTE.com – Ukun-na’in sira kontinua semo ba estranjeiru ho luxu uza osan estadu, enkuantu povu iha baze enfrenta difikuldade moris loroloron, hodi hamosu kritika kona-ba prioridade governu nian iha jestaun osan públiku.
Distánsia entre lideransa no povu sai preokupasaun públika, liuliu kona-ba despeza estadu ba viajen estranjeiru no nesesidade atu fó prioridade ba interese komunidade nian.
Iha komunidade sira, família barak kontinua luta atu responde ba nesesidade bázika, inklui edukasaun, transporte no oportunidade ekonómika. Kondisaun ne’e hamosu pergunta kona-ba atensaun ne’ebé governu fó ba povu iha baze.
Despeza ba viajen estranjeiru ho fasilidade luxu sai pontu debate kona-ba responsabilidade lideransa nian atu asegura katak osan públiku uza ho efisiénsia no fó benefísiu ba sidadaun sira.
Observadór ekonomia, Jacinto Soares, kritika prioridade gastu públiku no hateten katak viajen estranjeiru tenke iha balansu ho nesesidade urjente povu nian.
“Ita labele husik povu iha baze moris ho susar, enkuantu ukun-na’in sira la’o livre ho bilete luxu ba estranjeiru,” dehan Jacinto Soares ba STL, iha Akait, Díli, Sesta (30/10/2026).
Jacinto subliña katak, gastu ba viajen estranjeiru ne’ebé la hatudu benefísiu klaru ba dezenvolvimentu nasionál, bele hamenus konfiansa públika ba instituisaun governu.
Nia husu, governu atu fó prioridade ba programa sira ne’ebé fó benefísiu direta ba moris loroloron povu nian iha munisípiu hotu.
Iha sorin seluk, akadémiku Universidade da Paz (UNPAZ), Daniel da Costa, mós kritika prioridade despeza estadu nian no husu lideransa atu hatudu responsabilidade sosiál, no étika iha jestaun osan públiku.
“Kazu ne’e hatudu krize prioridade ne’ebé kle’an iha governu. Povu kontinua hasoru susar, maibé ukun-na’in sira semo ba estranjeiru ho osan públiku. Ne’e mós kestaun morál no étika polítika nian ne’ebé presiza korrije lalais,” dehan Daniel da Costa.
(eme)
