DILI, STLTIMORLESTE.com – Konsellu Nasionál Juventude Timor-Leste (CNJTL) apela ba juventude hotu atu evita konflitu no violénsia, hodi hametin paz, unidade nasionál no estabilidade iha Timor-Leste.
Prezidente Konsellu Juventude Dili, Manecas Lobo dos Santos, hatoo apelu nee iha konferénsia imprensa, iha Palapasu, Dili, Sesta-feira (30/10/2026).
Manecas dehan juventude tenke sai forsa importante ba manutensaun dame no dezenvolvimentu nasionál, laós sai kauza ba instabilidade no violénsia.
Juventude feto no mane husi aldeia, suku, postu administrativu too munisípiu tenke evita konflitu no hahalok kriminál, hanesan asalta, tuda no baku malu,dehan Manecas.
Nia esplika katak konflitu entre grupu juventude akontese iha área urbana no remota, liuliu durante feriadu nasionál no tempu finadu.
Tuir Manecas, períodu nee tenke sai momentu atu hametin relasaun família, laós kria ódiu, vingansa no ameasa ba seguransa komunidade.
Tanba nee, CNJTL husu ba lideransa organizasaun arte marsiál no arte rituál hotu atu kontrola sira-nia membru, liuliu sira neebé uza atributu organizasaun iha públiku.
Lideransa organizasaun sira tenke foti medida rigorozu hasoru membru neebé la iha disiplina no envolve iha violénsia ka hahalok kriminál,nia afirma.
CNJTL mós apela ba lideransa partidu polítiku hotu atu la uza juventude no organizasaun arte marsiál ka arte rituál nuudar instrumentu polítiku ba objetivu eleitorál.
Organizasaun nee konsidera juventude nuudar jerasaun kontinuidade no esperansa futuru nasaun. Tanba nee, partidu polítiku sira tenke fó prioridade ba edukasaun sivika no sidadania.
Ba Komisaun Reguladora Arte Marsiál (KRAM), CNJTL husu atu foti desizaun rigorozu hasoru membru neebé envolve iha konflitu, violénsia no krime, tuir prosesu legal.
Iha área seguransa, CNJTL husu ba autoridade seguransa no defeza nasionál atu aumenta vijilánsia no halo asaun firme hasoru juventude neebé envolve iha konflitu no krime organizadu.
Apelu nee sai importante liuliu durante tempu finadu, neebé dala barak akontese konfrontu entre grupu juventude organizadu ho istória konflitu.
Kona-ba reativasaun organizasaun arte marsiál no arte rituál, CNJTL husu ba Governu atu kria uluk kondisaun no mekanizmu koordenasaun neebé klaru.
CNJTL propoin mós kria rede juventude ho naran Juventude AMAR, atu halibur lideransa no membru organizasaun arte marsiál, arte rituál, juventude bairru, estudante, igreja no partidu polítiku.
Tuir organizasaun nee, rede Juventude AMAR bele sai plataforma atu hametin kooperasaun, konsolida paz, promove unidade nasionál no suporta dezenvolvimentu sustentável.
Manecas afirma katak, organizasaun juventude rezisténsia sei kontinua monitoriza juventude neebé envolve iha konflitu, violénsia no krime organizadu, no entrega informasaun relevante ba autoridade seguransa.
Nia mós fó hanoin ba juventude atu valoriza sakrifísiu herói nasionál sira neebé fó sira-nia moris hodi liberta Pátria, liuhusi hahalok konstrutivu no patriotizmu.
Konferénsia imprensa nee taka ho apelu ba juventude atu hametin unidade, paz no dezenvolvimentu nasionál.
(alb)
