BAUCAU, STLTIMORLESTE.com – Fundasaun Klinika Lafaek Diak rejistu kazu ma-nutrisaun hamutuk 41 durante fulan haat, husi Maiu to’o Agostu 2026, iha Munisípiu Baucau.
Médiku Jerál, Sirineo Piedade Pinto, hateten katak kazu sira-ne’e identifika liuhusi programa atendimentu regular ne’ebé foka ba tetu todan no sukat altura ba bebe no labarik idade 0–5 tinan, hodi monitoriza sira-nia kresimentu no deteta sedu problema ma-nutrisaun.
“Durante fulan Maiu to’o Agostu 2026, ami hetan labarik sira ne’ebé sofre ma-nutrisaun grave hamutuk 41,” Sirineo hateten ba jornalista sira iha Klínika Lafaek Diak, Triloca, Baucau Vila, Sesta (30/10/2026).
Nia informa katak, pasiente sira-ne’e mai husi Suku Bahu no Triloca, Postu Administrativu Baucau Vila, Suku Ostico no Loilubu, Postu Administrativu Vemasse, inklui suku seluk ne’ebé tama iha programa atendimentu móvel klínika nian.
Sirineo esplika katak, identifikasaun ma-nutrisaun grave bazeia ba protokolu Organizasaun Saúde Mundiál (OMS), ne’ebé konsidera labarik nia todan ne’ebé menus kompara ho idade, altura ne’ebé la tuir idade, no sinal físiku hanesan liman no ain krekas ho kabun boot.
Nia subliña katak, fator sira ne’ebé bele kauza ma-nutrisaun inklui falta informasaun ba inan-aman kona-ba importánsia fó susu inan nian durante fulan neen dahuluk, labarik sofre moras repetidamente no kondisaun ekonomia família ne’ebé vulnerável.
“Entaun, iha ne’e ami kontinua haforsa labarik sira-nia imunidade. Klínika mós fó apoiu ai-han hanesan fore-mungu, fos-rai, fehuk midar, mina nu’u, manu-tolun no hahán nutritivu seluk ba labarik sira hodi ajuda sira rekupera husi ma-nutrisaun,” nia akresenta.
Iha fatin hanesan, Juvita Helena da Silva, avó husi labarik na’in rua ne’ebé sofre ma-nutrisaun, husi Suku Bahu, konta katak nia oan-feto husik labarik sira iha nia kuidadu bainhira sira sei idade fulan rua, inan deside husik hela sira ba servisu iha Dili hamutuk ho nia la’en.
“Ha’u nia bei-oan na’in rua ne’e sofre ma-nutrisaun tanba sira-nia inan husik sira mai ha’u bainhira sira sei iha idade fulan rua. Sira la hetan susu inan, fó de’it susuben, tanba sira-nia inan-aman servisu hotu iha Dili,” Juvita konta.
Nia agradese ba Fundasaun Klinika Lafaek Diak tanba fó atendimentu no apoiu nutrisaun ba nia bei-oan na’in rua, ne’ebé agora hahú hatudu progresu iha prosesu rekuperasaun.
“Foin primeiru lori sira mai tetu, sira-nia todan menus tebes, maibé agora sa’e ona to’o kilogramas 12. Ha’u kontente tebes ho atendimentu ne’ebé klínika fó,” nia espresa.
Juvita mós afirma katak, apoiu ai-han hanesan fos-rai, manu-tolun no mina nu’u ne’ebé klínika fó kada semana ajuda tebes nia bei-oan na’in rua iha prosesu rekuperasaun husi ma-nutrisaun.
(tom)
