VIQUEQUE, STLTIMORLESTE.com – Uma komunidade ida iha Aldeia Loho, Suku Uma Uain Kraik, Postu Administrativu Viqueque Vila, Munisípiu Viqueque, mutuk totál tanba insendiu.
Komandante Operasaun Autoridade Protesaun Sivíl Munisípiu Viqueque, Cerilo Soares Gomes, informa katak insendiu ne’e akontese iha loron 31 Outubro 2026 oras 19:50, ho ahi lakan hahú husi parte kakuluk uma no alastra ba estrutura tomak.
Nia deskonfia katak, kauza insendiu ne’e mai husi problema iha sistema fiu eletrisidade.
“Ahi lakan ne’e hahú husi uma kakuluk, ne’ebé ami deskonfia katak kauza husi sirkuitu fiu eletrisidade. Uma ne’e uma tali ida,” Cerilo hateten ba STL liuhusi telefone, Domingu (01/11/2026).
Nia esplika katak, hafoin insendiu akontese, vítima sira kontaktu kedas Bombeiru Munisípiu Viqueque, ne’ebé konsege to’o iha fatin insendiu, maibé la konsege salva uma ne’e tanba distánsia.
Maski nune’e, Autoridade Protesaun Sivíl Munisípiu Viqueque rekoilla ona informasaun kona-ba situasaun família vítima sira nian, atu prepara apoiu emerjénsia no relata dadus ba nivel nasionál.
“Agora atu ba fo apoiu emerjensia. Uma ne’e iha membru família na’in haat. Sasan hotu ne’ebé iha uma laran la konsege salva. Agora família vítima sira hela temporariamente iha sira-nia família,” Cerilo relata.
Uma ne’ebé hetan insendiu ne’e pertense ba família Julião Soares, ho membru família na’in haat.
(tom)
