BAUCAU, STLTIMORLESTE.com – Sidadaun Leonel Eden preokupa ho planu operasaun seguransa Komando Polísia Munisípiu Baucau nian ba área risku sira iha Munisípiu Baucau.
Família vítima, Leonel Eden relata katak, Sábadu (31/10/2026), por volta tuku 19:00, família sira ho kareta Carry husi Baucau Vila atu ba Postu Administrativu Quelicai selebra Loron Finadu, maibé hetan asaun tuda husi grupu ema balu iha área Ponte Seiçal, Baucau Vila.
“Tuda ne’e kona kedas alin sira iha kareta laran. Alin ida hetan tuda iha nia ulun, nune’e ami lori sai ba Quelicai hodi hetan tratamentu, tanba ran sai barak,” hateten Leonel ba STL liuhusi telefone, Domingu (01/11/2026).
Nia manifesta preokupasaun tanba, tuir nia, durante loron importante hanesan Loron Finadu, movimentasaun sidadaun sira nian ba área foho aumenta, maibé sei iha ema balu ne’ebé halo asaun irresponsável hasoru ema seluk ne’ebé utiliza estrada públika.
Leonel esplika katak, maski asaun tuda ne’e rezulta membru família ida hetan kanek, maibé família la konsege aprezenta keixa ba Polísia Eskuadra Postu Baucau Vila, tanba tenke fó prioridade ba lori vítima ba Sentru Saúde Quelicai hodi hetan tratamentu emerjénsia.
Nia mós kritika preparasaun operasionál seguransa Polísia nian iha área Seiçal, ne’ebé tuir nia, dala barak akontese ona kazu hanesan ne’e durante tinan sira.
“Sasan hanesan ne’e Polísia hatene ona. Seiçal ne’e la’ós foin primeira vez, kada tinan akontese. Loloos Polísia tenke antisipa ona, haree área risku sira no tau membru iha terrenu hodi asegura seguransa. Área risku iha Baucau parte ba Lospalos no Baguia, hanesan Seiçal ho Mulia, mak presiza antisipa. La’ós hein akontese tiha mak foin tun halo atuasaun,” kritika Leonel.
Tanba ne’e, família vítima nian rekomenda ba Komando Polísia Munisípiu Baucau atu identifika área risku sira iha territóriu munisípiu no koloka efetivu polísia iha terrenu hodi halo prevensaun no antisipa situasaun ne’ebé la espera.
Relasiona ho kazu ne’e, STL seidauk hetan komentáriu husi Komando Polísia Munisípiu Baucau. Antes ne’e, iha 29 Outubru 2026, STL tenta konfirma ho Komandante Komando Polísia Munisípiu Baucau iha edifísiu Administrasaun Munisípiu Baucau kona-ba planu seguransa ba selebrasaun Loron Finadu, maibé komandante refere lakohi fó komentáriu.
(tom)
