COVALIMA, STLTIMORLESTE.com – Ekipa Operasaun Konjunta preende sasán kontrabandu, inklui fugetes 576, mina no gasolina litru 465, iha fronteira Tilomar, Covalima.
Operasaun nee halao iha loron 29 Outubru 2026, oras 22:00, iha área Kanuhasan, Aldeia Wetabak, Suku Beiseuc, Postu Administrativu Tilomar.
Aleinde fugetes marka Roman Candle, ekipa apreende mos kilat manu marka Sarap Taiger ida, bebidas asukáradas marka Olala Milky Jelly kaixa 9 no motorizada rua.
Fugetes neebé apreende hamutuk kaixa neen, ho kada kaixa iha fugetes batang 96, totál 576. Suspeitu sira transporta sasán nee ho motorizada Honda Genio no Honda Beat.
Motorizada rua nee ho matríkula AC.6507 TL no AB.1700 TL, neebé suspeitu sira abandona bainhira haree ekipa operasaun konjunta.
Ekipa konsege apreende fugetes 576, neebé suspeitu nain rua transporta ho motorizada rua,haktuir nota komunikadu imprensa neebé STL asesu husi media PNTL, iha Sábadu (31/10/2026).
Durante operasaun, mane nain rua neebé kondús motorizada hirak-nee halai sai husi fatin, abandona sasán no transporte neebé sira uza.
Ekipa Konjunta kontinua operasaun iha área hanesan no konsege apreende mina rai no gasolina ho kuantidade total litru 465.
Autoridade deskonfia sasán hirak-nee tama mai Timor-Leste husi nasaun viziñu Indonézia, la tuir prosedimentu importasaun no regulamentu aduaneiru.
Operasaun nee lidera husi Autoridade Aduaneira (AA), hamutuk ho Diresaun Servisu Investigasaun Kriminál (DSIK), Diresaun Servisu Informasaun Polísia (DSIP) no Polísia Sientífika Investigasaun Kriminál (PCIC).
Instituisaun seluk neebé partisipa mak Servisu Nasionál Intelijénsia Estratéjiku (SNIE), membru D2 F-FDTL, S2 Unidade FALINTIL no Unidade Patruillamentu Fronteira (UPF) iha Mota Masin.
Hafoin apreensaun, ekipa asegura sasán hotu no lori ba Autoridade Aduaneira iha Covalima atu halo verifikasaun no prezerva evidénsia.
Iha loron 30 Outubru 2026, oras 12:10, ekipa Konjunta entrega evidénsia hirak-nee diretamente ba Ministériu Públiku (MP) atu kontinua prosesu tuir prosedimentu legál.
Ministériu Públiku rejista ona kazu nee iha loron hanesan, oras 12:22, ho númeru rejistu NUC: 397.PRPIC.26.
Apreensaun nee hatudu kooperasaun entre instituisaun seguransa no autoridade kompetente sira atu kombate kontrabandu, kontrola movimentu merkadoria iha fronteira no asegura kumprimentu ba lei aduaneira.
(alb)
