BOBONARO, STLTIMORLESTE.com – Polísia Nasionál Timor-Leste (PNTL) detein suspeitu nain haat tanba deskonfia envolve iha konfrontu neebé hakanek joven ida iha Suku Maliubu, Bobonaro.
Operasaun nee halao husi Batallaun Ordem Públika (BOP), Companhia Delta, neebé lidera husi Inspetór Asistente Polísia Celestino Freitas Ornai.
BOP Companhia Delta hamutuk ho Eskuadra Polísia Bobonaro halao intervensaun operasionál atu responde ba konfrontu neebé akontese iha suku nee.
“Iha intervensaun nee, BOP Companhia Delta ho kolaborasaun Eskuadra Polísia Bobonaro kaptura suspeitu nain haat”,informa nota imprensa PNTL neebé STL asesu husi média ofisiál PNTL, Domingu (01/11/2026).
Konfrontu nee rezulta joven ida kanek no hetan kedas atendimentu médiku iha Postu Saúde Cile.
Suspeitu nain haat nee entrega ona ba Eskuadra Polísia Bobonaro atu prosesa tuir lei neebé vigora.
PNTL informa katak, situasaun seguransa iha fatin akontesimentu normaliza ona.
UEP/COE Hametin Seguransa iha Dili
Iha informasaun seluk, Unidade Espesiál Polísia (UEP), liuhusi Companhia de Operações Especiais (COE), kontinua hametin seguransa iha kapitál Dili.
Hafoin formatura kalan, pesoál COE halao patrullamentu intensivu iha área sira neebé konsidera risku, hodi prevene krime no garante seguransa públika.
Aleinde patrullamentu, pesoál COE mós responde kedas ba kazu balun, inklui fó asisténsia médika ba vítima ida.
Suspeitu ida neebé envolve iha kazu nee entrega mós ba Eskuadra Polísia atu prosesa tuir lei neebé vigora.
(alb)
