ZUMALAI, STLTIMORLESTE.com – Komunidade ne’ebé hela iha Zulo Knua, Suku Zulo, Postu Administrativu Zumalai, Munisípiu Covalima, hasoru hela difikuldade atu asesu ba bee moos, tanba bee iha posu sira ne’ebé komunidade uza maran ona, ne’ebé obriga sira atu hein malu durante kalan tomak.
Komunidade Santina de Jesus, husi Aldeia Lale, Suku Zulo, Postu Administrativu Zumalai, Munisípiu Covalima, hato’o katak, situasaun bee maran ne’e halo komunidade sira tenke hadau malu bee moos durante kalan, tanba posu tolu ka haat ne’ebé sira uza antes maran hotu ona.
“Ami hadau malu bee moos iha tempu kalan, tanba agora bee maran. Bee iha posu tolu ka haat maran hotu, nune’e ami tenke lori jerikán sira atu hein bee durante kalan, atu bele hetan bee moos. Dala ruma, ami lori jerikán ho transporte hanesan motór ka kareta husi Zumalai mai Zulo Knua, ba ema ne’ebé iha transporte,” dehan Santina ba STL iha Zulo Knua, Domingu (01/11/2026).
Santina hatutan katak, to’o agora komunidade iha Zulo Knua kontinua enfrenta problema bee moos tanba bee maran. Nune’e, komunidade tenke hein iha bee-matan durante kalan to’o posu nakonu mak bele enxe bee ba jerikán no lori ba uma.
Tuir observasaun STL iha terenu, komunidade sira lori jerikán ba husik iha bee-matan no hein to’o kalan, bainhira posu nakonu foin sira bele enxe bee atu lori ba uma.
(jac)
