BAUCAU, STLTIMORLESTE.com – Autoridade Protesaun Sivíl (APC) Munisípiu Baucau sei koordena ho ekipa konjunta husi Autoridade Munisipál Baucau atu fó apoiu bee moos ba komunidade sira iha área ne’ebé identifika ho risku menus bee moos durante tempu bailoron naruk.
Komandante Operasaun APC Baucau, Francisco Viana Freitas, relata katak Autoridade Munisipál Baucau iha ona polítika atu fó apoiu bee moos ba komunidade sira iha suku ne’ebé enfrenta risku menus bee moos durante tempu bailoron naruk.
Maski nune’e, to’o agora APC Baucau seidauk hahú distribui bee moos ba komunidade sira, tanba sei iha prosesu koordenasaun entre ekipa konjunta no instituisaun sira seluk ne’ebé envolve iha ekipa refere.
“Ami sei koordena determina data ida ne’ebé ami bele ba no fatin ne’ebé mak ami deskonfia iha risku ba bee. Ami iha ona mapa risku ba dezastre liga ho bee, ami sei la’o tuir dadus ne’ebé iha,” hateten Francisco Viana Freitas ba jornalista sira iha Tirilolo, Baucau, Sesta (06/11/2026).
Nia hatutan katak, bazeia ba rezultadu mapamentu husi ekipa konjunta, suku sira ne’ebé identifika ho risku menus bee moos kauza husi bailoron naruk inklui Suku Abafala, Lelalai, Uaigae, Quelicai Antigu no Laga.
Francisco esplika katak, kondisaun bee iha fatin sira ne’ebé temi seidauk maran totalmente, maibé hahú menus neineik. Maski nune’e, APC Baucau seidauk simu pedidu ofisiál husi suku sira kona-ba problema menus bee moos ne’ebé fó impaktu ba komunidade.
“To’o agora APC seidauk simu pedidu ruma ligadu ho bee laiha. Se pedidu mai ona, ami la mesak, maibé ekipa konjunta mak sei konsentra iha fatin ida atu fornese bee ba,” nia afirma.
(tom)
