DILI, STLTIMORLESTE.com – Leonela Martins feto ne’ebé lidera ha kaza militár iha Prezidensiá Repúblika.
Prezidénsia Repúblika fó rekoñesimentu ba Leonela do Rosario Martins, feto lider ne’ebé kontribui iha área seguransa no Kaza Militár Prezidensiál.
Adjunta-Xefe Kaza Militár Prezidensiál, Leonela do Rosario Martins, hahú ninia karreira iha Polísia Nasionál Timor-Leste (PNTL) iha tinan 2001.
Durante liu dékada rua, nia hala’o kna’ar nu’udar auditora iha Inspesaun Jerál PNTL, no hetan esperiénsia iha área kontrolu no supervizaun institusionál.
Molok tama servisu iha Palásiu Prezidensiál, Leonela hala’o kna’ar nu’udar Adjunta Komandante Munisípiu Ainaro, iha área seguransa ne’ebé tradicionalmente domina husi mane.
Iha fulan Agostu 2026, nia asume kna’ar nu’udar Adjunta-Xefe Kaza Militár iha Palásiu Prezidensiál, ho responsabilidade atu dirije no superviziona membru sira iha terrenu.
Nia mós hala’o koordenasaun ho entidade relevante, ezekuta orden no despaxu, no asegura implementasaun kna’ar sira tuir Lei Orgánika Prezidensiál.
Leonela hateten katak, nia sente orgullu tanba hetan oportunidade atu servisu iha Kaza Militár no hala’o responsabilidade lideransa nu’udar feto.
“Ha’u sente orgullu tanba bele dirije no kontrola membru sira nu’udar feto ida iha pozisaun lideransa,” dehan nia husi Komunikadu ne’ebé STL asesu, Sesta 06/11/2026.
Durante ninia trajetória profisionál, Leonela enfrenta dezafiu atu fahe tempu entre responsabilidade servisu no família, inklui sentimentu falta konfiansa-an no ta’uk atu la konsege atinje susesu.
Maibé, nia kontinua avansa ho korajen, determinasaun no kompromisu, hodi tau interese komun nu’udar prioridade iha hala’o responsabilidade profisionál.
Istória Leonela sai ezemplu kona-ba partisipasaun feto iha área lideransa, liuliu iha instituisaun ne’ebé tradisionalmente domina husi mane.
Prezidénsia Repúblika fó rekoñesimentu ba ninia trajetória iha kuadru selebrasaun Loron Nasionál Feto Timor-Leste ba dala 50, ho tema “Feto Timor-Leste Tinan 50: Igualdade no Inkluzaun”.
Selebrasaun ne’e lori lema “Ami Feto Timor-Leste La Rende — Sei Luta Nafatin To’o Atinje Igualdade no Inkluzaun”, nu’udar apelu atu kontinua hametin igualdade no oportunidade ba feto iha Timor-Leste.
(eme)
