DILI, STLTIMORLESTE.com — Komite 12 Novembru hamutuk ho MJDAK realiza konsulta masal gratuita ba sobrevivente Masakre Santa Cruz no públiku, iha Dili.
Diretór-Jerál Juventude, Mario Tilman hatete katak, atividade ne’e organiza hodi komemora dala 35 Masakre Santa Cruz, no fó atensaun ba saúde sobrevivente sira.
Atividade ne’e mós iha objetivu atu lembra fali kontribuisaun joven sira ne’ebé partisipa iha luta ba ukun-rasik-an iha 1991.
“Atividade ne’e hodi lembra fali loriku asuwain ne’ebé partisipa iha fakar ran no luta ba ukun-rasik-an,” Mario Tilman dehan ba jornalista iha edifísiu MJDAK, Lesidere, Sesta (06/11).
Nia esplika katak, konsulta masal ne’e hanesan kontribuisaun ba saúde povu, hodi kontinua valoriza no prepara kondisaun di’ak ba dezenvolvimentu nasaun.
Komisaun Organizadora Komemorasaun Masakre Santa Cruz, Denilson Guterres, hatete katak atividade komemorativa hahú ona iha 27 Outubru, ho reflesaun ba alma Sebastiao Gomes.
Iha 28 Outubru, organizadór sira realiza mós misa atu komemora aniversáriu tinan 35 mate Sebastiao Gomes.
Denilson informa katak, organizasaun atividade komemorasaun tinan ida-ne’e hetan apoiu orsamentál hamutuk US$ 20.000.
Nia hatete katak, konsulta masal ne’e normalmente fó prioridade ba sobrevivente Masakre Santa Cruz, maibé iha tinan ida-ne’e, organizadór sira deside loke mós ba públiku jerál.
“Sempre iha tinan-tinan ami loke de’it ba sobrevivente sira, maibé iha tinan ne’e, tanba komemora dala 35, ami loke ba públiku sira mós,” Denilson afirma.
Konsulta masal ne’e hala’o durante loron ida, hahú tuku 09:00 dadeer to’o 16:00 lokraik, iha munisípiu Dili, lahó limitasaun ba númeru partisipante.
Servisu saúde ne’ebé oferese inklui konsultasaun ba matan, fuan, nehan no hasai resis. Ekipamentu médiku mai husi Ministériu Saúde, Hospital Nasionál Guido Valadares, no F-FDTL.
Aleinde ne’e, organizadór sira sei realiza mós marsa saudável iha loron Sábadu lokraik, ho objetivu atu lembra fali marsa iha luta ba ukun-rasik-an no promove saúde públika.
(dom)
