DÍLI, STLTIMORLESTE.com – Xina sei hahú konstrusaun hospitál militár iha Timor-Leste entre Fevereiru no Marsu 2027.
Ministru Defeza, Kontra-Almirante Donaciano do Rosário da Costa Gomes “Pedro Klamar Fuik” informa katak, dezeñu preliminár hospitál nian kompleta ona.
Atualmente, Xina kontinua finaliza dezeñu tékniku konstrusaun hospitál nian antes hahú obra.
“Dezeñu preliminár kompleta ona, no agora sira finaliza dezeñu. Iha Fevereiru ka Marsu tinan oin, konstrusaun sei hahú,” Ministru Defeza hateten.
Nia hato’o informasaun ne’e ba jornalista sira iha Ministériu Defeza, Fatuhada, Díli, Sesta (06/11/2026).
Ministru Defeza fó informasaun ne’e hafoin simu vizita kortesia husi Embaixadór Fransa ba Indonézia, Timor-Leste no ASEAN, Fabian Penone.
Governante ne’e esplika katak, hospitál militár ne’e sei uza teknolojia moderna atu fornese asisténsia médika ba membru F-FDTL no populasaun tomak.
“Hospitál ida-ne’e sei modernu no di’ak. La’ós de’it ba militár sira, maibé ba mós populasaun tomak,” nia afirma.
(jen)
