DILI, STLTIMORLESTE.com – Prezidente Repúblika, José Ramos-Horta afirma katak, igualdade jéneru tenke hahú husi uma laran, liuliu husi inan-aman sira iha prosesu edukasaun no kuidadu ba labarik.
Hato’o mensajen durante selebrasaun Loron Nasionál Feto ba dala 50, iha sentru CCD, Sesta 06/11/2026 Prezidente Horta husu família sira atu promove igualdade jéneru hahú husi labarik sira nia moris.
Nia hatete katak, Konstituisaun Repúblika Demokratika Timor-Leste, ne’ebé adota iha 2002, konsagra igualdade jéneru nu’udar prinsipiu fundamental iha estadu demokrátiku.
“Ita konsagra obrigasaun no fiar estadu nian kona-ba igualdade jéneru, ne’ebé tenke hahú kedas husi inan sira ne’ebé isin-rua no labarik sira ne’ebé foin moris,” dehan Prezidente Horta.
Nia esplika katak, Estadu tenke fó atensaun ba saúde no protesaun ba inan no labarik, hodi garante sira hetan kuidadu adekuadu.
Prezidente Horta mós husu Governu atu reforsa atensaun ba edukasaun, hahú husi ensinu primáriu, pré-sekundáriu, universidade to’o funsaun públika no sistema polítiku.
Nia lembra feto sira nia kontribuisaun iha luta libertasaun nasionál, inklui sira ne’ebé partisipa iha frente armada, rede klandestina no rede internasionál, ne’ebé hasoru tortura no violénsia.
Nia mós alerta katak, violénsia doméstika kontinua sai dezafiu iha Timor-Leste, maski nasaun hetan ona restaurasaun independénsia.
“Ita tenke rekoñese feto sira nia valor no direitu. Sira mak ita nia inan, feton, avó no tia. Sira la’ós ema estranjeira,” afirma Horta.
Prezidente husu mane sira atu halo reflesaun no kontribui ba protesaun direitu feto nian, hodi harii sosiedade ne’ebé respeita igualdade jéneru.
Nia subliña katak, igualdade jéneru la’ós konseitu foun ne’ebé mai husi kultura Osidentál, maibé iha ona abut iha istória, família no kriasaun Maromak.
Iha mensajen ba feto sira, Prezidente Horta apresia sira nia servisu no responsabilidade iha família, komunidade no dezenvolvimentu nasionál.
Nia mós afirma katak, selebrasaun tinan 50 Loron Nasionál Feto la’ós de’it momentu atu selebra, maibé oportunidade atu reflete kona-ba progresu ne’ebé atinje ona no responsabilidade ba futuru.
“Ita tenke hatete ho firmeza katak igualdade jéneru no inkluzaun sosiál importante atu garante dezenvolvimentu no prosperidade inkluziva ba ema hotu, inklui feto sira,” dehan Prezidente Horta.
(eme)
