DÍLI, STLTIMORLESTE.com – Gregório Saldanha hato’o preokupasaun kona-ba problema atendimentu saúde públiku, inklui falta aimoruk no limitasaun servisu hospitál ne’ebé kontinua sai keixa komunidade nian.
Nia husu Primeiru-Ministru atu la’ós rona de’it keixa públiku, maibé foti desizaun hasoru membru governu ne’ebé la kumpre responsabilidade iha sira-nia knaar.
“Primeiru-Ministru mak tenke muda membru governu ne’ebé la hala’o knaar ho di’ak,” haktuir Prezidente Komite 12 de Novembru nee ba jornalista iha Sede Komite 12 de Novembru, Balide, Sesta (06/11/2026).
Nia hateten katak, problema saúde públiku presiza atensaun séria, tanba sidadaun barak kontinua hasoru difikuldade atu asesu tratamentu médiku.
Tuir nia, falta aimoruk no atendimentu saúde ne’ebé limita ba fó reseita de’it aumenta todan família kiak sira, ne’ebé la iha kapasidade finanseira atu sosa aimoruk.
“Ba ema ne’ebé osan laiha, atu hetan osan husi ne’ebé?” nia husu, hodi hatudu difikuldade ekonomia ne’ebé pasiente sira enfrenta.
Gregório mós afirma katak, maski governu aprova orsamentu boot kada tinan, problema saúde sei kontinua bainhira implementasaun no jestaun la lao ho di’ak.
Tanba ne’e, nia husu instituisaun fiskalizasaun, inklui Komisaun Anti-Korrupsaun (KAK) no Prokuradoria, atu hala’o knaar kontrolu no investiga irregularidade iha jestaun setór saúde.
Nia mós apela ba governu atu labele subar informasaun kona-ba problema saúde públiku, inklui falta aimoruk iha ospitál sira.
Gregório konsidera katak, transparénsia no asesu ba informasaun públiku mak direitu sidadaun nian, no governu iha obrigasaun atu fó informasaun loos kona-ba problema ne’ebé akontese.
(dom)
