DÍLI, STLTIMORLESTE.com – Prezidente Republika (PR), José Ramos-Horta simu Doutor Honoris Causa husi Universidade Chung-Ang, Repúblika Koreia, ba ninia kontribuisaun globál.
Prezidente Repúblika no Laureadu Nobel ba Pás, José Ramos-Horta, simu titulú Doutor Honoris Causa iha Direitu husi Universidade Chung-Ang, iha loron 6 Novembru 2026.
Serimónia ne’e hala’o iha Repúblika Koreia, ho partisipasaun husi dirijentes universidade, profesór, estudante no membru delegasaun Timor-Leste.
Prezidente Universidade Chung-Ang, Profesór Se-Hyun Park, hamutuk ho Dekanu Eskola Graduadu, mak entrega titulú honorífiku ne’e.
Universidade Chung-Ang fó rekoñesimentu ba Ramos-Horta nia kontribuisaun ba independénsia Timor-Leste, dezenvolvimentu demokrátiku, protesaun direitus umanus no promosaun pás.
Ramos-Horta dedika onra ne’e ba povu Timor-Leste, ne’ebé kontribui ho korajen no reziliénsia durante luta ba independénsia no harii nasaun demokrátiku.
Iha ninia diskursu, nia subliña importánsia edukasaun nu’udar baze fundamental ba dezenvolvimentu nasaun no kriasaun oportunidade ba jerasaun foun.
“Edukasaun maka ponte entre nasaun ne’ebé ita iha ohin loron no nasaun ne’ebé ita hakarak atu sai.” dehan PR Horta liu husi Komunikadu ne’ebé STL asesu Segunda 09/11/2026.
Prezidente mós uza esperiénsia Repúblika Koreia nu’udar ezemplu kona-ba transformasaun nasaun liuhusi investimentu sustentável iha edukasaun no kapitál umanu.
Nia destaka katak, koñesimentu, kriatividade no kapasidade rekursu umanu mak patrimóniu importante liu ba dezenvolvimentu sustentável.
Ramos-Horta mós ko’alia kona-ba Timor-Leste nia progresu dezde restaurasaun independénsia iha 2002, inklui adezaun nu’udar membru ASEAN.
Maski nune’e, nia rekoñese katak nasaun sei enfrenta dezafiu iha kriasaun empregu, edukasaun, saúde no diversifikasaun ekonomia.
Nia defende katak, siénsia, teknolojia no inovasaun tenke sai prioridade iha estratéjia dezenvolvimentu Timor-Leste nian.
Iha kontestu ne’e, nia refere ba Simeira Siénsia ba Dezenvolvimentu, ne’ebé hala’o iha Dili, iha Agostu 2026.
Prezidente husu Universidade Chung-Ang no instituisaun akadémika Koreia nian atu hametin kooperasaun ho universidade sira iha Timor-Leste.
Kooperasaun ne’e inklui peskiza sientífika, interkámbiu estudante no profesór, no dezenvolvimentu kapasidade téknika.
Nia mós enfatiza responsabilidade universidade sira nian atu promove umanidade, kompaixaun no integridade, la’ós de’it koñesimentu tékniku.
Aleinde ne’e, Ramos-Horta alerta kona-ba intimidasaun sibernétiku no asédiu online, no husu kolaborasaun husi família, eskola, governu no empreza teknolojia.
Serimónia ne’e realiza nu’udar parte husi vizita ofisiál Prezidente Ramos-Horta ba Repúblika Koreia, ho objetivu atu hametin amizade bilaterál no buka oportunidade kooperasaun foun.
Prezidente taka ninia diskursu ho agradesimentu ba Universidade Chung-Ang no reafirma kompromisu atu kontinua promove pás, edukasaun, kooperasaun sientífika no oportunidade ba joven sira.
(eme)
