BAUCAU, STLTIMORLESTE.com – Xefe Suku Bado-ho’o, Pedro do Rosario hatete, projetu reabilitasaun Bee Manas Uaicana iha Suku Bado-ho’o, Venilale, hetan ona aprovasaun, inklui dezeñu no BoQ, maibé to’o agora seidauk implementa.
Pedro do Rosario hateten katak, Bee Manas Uaicana foin lalais hetan estatutu hanesan patrimóniu turizmu nasionál, no prosesu verifikasaun remata ona. Maibé, to’o agora servisu rehabilitasaun seidauk hahú.
Nia esplika katak, orsamentu ba projetu ne’e aprova ona entre tinan 2025 no 2026, maibé nia seidauk hatene montante orsamentu ne’ebé aloka ba projetu refere.
Maski nune’e, informasaun kona-ba implementasaun projetu ne’e rejista ona iha portal Munisípiu, ne’ebé hatudu katak projetu rehabilitasaun Bee Manas Uaicana sei implementa iha tinan 2026.
“Orsamentu ne’e aprova tiha ona, maibé faze implementasaun mak seidauk. Dezeñu no BoQ (Bill of Quantities) mai hotu ona, maibé to’o agora servisu rehabilitasaun seidauk implementa,” Pedro do Rosario hateten ba STL liuhusi telefone, Segunda-feira (09/11/2026).
Nia hatutan katak, seidauk hatene razaun saida mak impede prosesu implementasaun projetu refere. Tanba ne’e, nia sei lori asuntu ne’e ba diskusaun iha ASPA, atu aprezenta ba Autoridade Munisipál Baucau.
Pedro do Rosario konsidera katak, Bee Manas Uaicana tama iha projetu boot ne’ebé mai diretamente husi Governu Sentral.
“Hanesan autoridade, ami sente triste tanba reabilitasaun ba bee ne’e seidauk realiza. Bee Manas Uaicana ne’e fatin turizmu naturál ida ne’ebé iha potensial boot,” nia komenta.
Tanba ne’e, nia husu Autoridade Munisípal Baucau atu koordenada entidade kompetente sira iha Nasionál hodi fó atensaun ba fatin turizmu refere no aselera implementasaun projetu reabilitasaun, hodi dezenvolve potensial turizmu iha Suku Bado-ho’o, Postu Administrativu Venilale, Munisípiu Baucau.
To’o notisia ne’e públika, STL seidauk hetan komentáriu husi Prezidente Autoridade Munisípal Baucau, Veneranda Lemos, tanba hala’o hela servisu balu iha Dili.
(tom)
