DÍLI, STLTIMORLESTE.com – Prezidente Repúblika (PR), José Ramos-Horta afirma katak, vizita ba Seoul, Koreia, objetivu atu hametin relasaun bilaterál no kooperasaun entre nasaun rua.
Prezidente Ramos-Horta hato’o deklarasaun ne’e liuhusi komunikadu imprensa ne’ebé Suara Timor Lorosa’e (STL) asesu iha segunda-feira, 9 Novembru 2026.
“Vizita mai Seoul sai hanesan oportunidade valiozu ida hodi hametin amizade kleur entre Timor-Leste no Repúblika Koreia, partikularmente iha edukasaun, empregu, teknolojia, investimentu no dezenvolvimentu ekonómiku tanba Timor-Leste hahú nia kapítulu foun nu’udar membru ASEAN ba dala sanulu-resin-ida. Ha’u agradese ba Koreia nia kontribuisaun ne’ebé dura ba ami-nia dezenvolvimentu husi forsa pás Koreianu nian durante ami-nia tranzisaun ba independénsia to’o servisu parseiru no voluntáriu Korea nian,” dehan Horta.
Nia afirma katak, vizita ne’e sei loke oportunidade foun ba kooperasaun iha edukasaun, empregu, teknolojia, investimentu no dezenvolvimentu ekonómiku.
“Ha’u otimista atu hametin relasaun bilaterál liuhusi dezenvolvimentu abilidade joven sira, oportunidade empregu no investimentu Koreanu,” dehan Prezidente Ramos-Horta.
Nia mós agradese ba kontribuisaun Koreia nian ba Timor-Leste, inklui apoiu durante tranzisaun ba independénsia, servisu parseiru no programa voluntariadu.
Iha enkontru ofisiál, Prezidente Ramos-Horta no Prezidente Koreia, Lee Jae Myung, konkorda atu hametin kooperasaun iha área estratéjika sira.
Área kooperasaun inklui propriedade intelektuál, mudansa klimátika, dezenvolvimentu, seguransa, kooperasaun polísia no empregu.
Líder na’in rua mós konkorda atu promove edukasaun lian Koreanu, dezenvolvimentu rekursu umanu no konsultasaun bilaterál regulár.
Iha área rejionál, Koreia no Timor-Leste sei kontinua kooperasaun kona-ba adezaun Timor-Leste ba ASEAN no preparasaun Prezidénsia ASEAN 2029.
Prezidente Ramos-Horta mós reafirma apoiu Timor-Leste ba esforsu Koreia nian atu promove pás iha Península Koreana liuhusi diálogu no kooperasaun.
Simeira ne’e subliña relasaun amizade entre nasaun rua, ne’ebé sei selebra aniversáriu ba dala 25 husi estabelesimentu relasaun diplomátika iha tinan oin mai.
(eme)
