DILI, STLTIMORLESTE.com — Primeiru-Ministru (PM), Xanana Gusmão loke dalan ba feto atu asume kargu Prezidente Repúblika, hodi hametin oportunidade lideransa feto iha Timor-Leste.
Deklarasaun ne’e hamosu diskusaun kona-ba oportunidade ba feto sira atu lidera nasaun, liuliu iha kargu polítiku aas.
Durante tinan barak, kargu Prezidente Repúblika iha Timor-Leste sempre asume husi mane, maski feto sira mós iha esperiénsia iha área polítika no governasaun.
Partisipasaun feto iha prosesu polítiku sai aspetu importante ba demokrasia, tanba lideransa nasionál presiza fó oportunidade hanesan ba sidadaun hotu.
Maski apoiu polítiku bele loke dalan ba kandidata feto, kapasidade, integridade no vizaun tenke sai kritériu importante atu lidera nasaun.
Iha kontestu ne’e, Observadór Polítika, Antonio Magno, konsidera deklarasaun Xanana nian hanesan sinal pozitivu ba demokrasia no partisipasaun feto iha polítika.
Nia hateten katak apoiu husi lider polítiku importante, bele fó motivasaun ba feto sira atu envolve an iha lideransa nasionál.
“Se nia dehan sei apoia feto ida atu sai Prezidente Repúblika, ne’e hatudu katak feto mos iha kapasidade no oportunidade atu lidera nasaun,” dehan Antonio Magno ba STL, iha Kolmera, Dili, Segunda (09/11/2026).
Antonio hatutan katak feto Timor-oan barak iha esperiénsia iha luta libertasaun, Governu, Parlamentu no sosiedade sivíl.
“Feto Timor-oan barak mak iha ona esperiénsia iha luta libertasaun, iha Governu, iha Parlamentu no iha sosiedade sivíl. Sira merese atu sai lider,” nia hateten.
Nia subliña katak apoiu ba kandidata feto tenke bazeia ba kapasidade, integridade no vizaun ba futuru nasaun, la’ós tanba jéneru de’it.
“Ita labele apoia feto tanba de’it nia feto. Ita tenke apoia tanba nia iha kapasidade, iha integridade no iha vizaun ba futuru nasaun nian,” nia afirma.
Antonio husu partidu polítiku, sosiedade sivíl no povu atu fó oportunidade ba feto sira kompete ho justu iha eleisaun prezidensiál.
Iha parte seluk, Feto Potensiál, Lucinda Soares, mós apresia deklarasaun Primeiru-Ministru nian, ne’ebé konsidera hanesan abertura ba feto atu lidera nasaun.
“Ne’e hatudu katak lider sira komesa loke espasu ba feto atu lidera nasaun. Ida ne’e la’ós de’it kona-ba hau, maibé kona-ba feto Timor-oan hotu,” dehan Lucinda.
Lucinda hatutan katak feto sira presiza prepara an ho kapasidade, esperiénsia no kompromisu atu servisu ba povu.
“Se oportunidade ne’e mai, feto sira tenke hatudu katak sira bele. Ita tenke lidera ho laran moos, ho justisa, no tau interese povu nian aas liu duké interese pesoál ka partidu nian,” nia hateten.
Antes ne’e, Primeiru-Ministru Xanana Gusmão deklara katak nia sei fó apoiu ba feto ida atu asume kargu Prezidente Repúblika.
“Permite mai ha’u pessoalmente deklara, ha’u sei apoia feto ba Prezidente Repúblika,” dehan Xanana.
Iha okaziaun ne’e, Xanana mós enkoraja feto jerasaun foun atu kontinua estuda, dezenvolve koñesimentu no luta hodi atinje sira-nia objetivu.
(car)
