BAUCAU, STLTIMORLESTE.com – Xefe Estadu-Maior-Jerál Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek”, ofisialmente aberta Ezersísiu Matebian 26.02 no Semana Sobrevivénsia, ne’ebé hala’o iha Komponente Terrestre, Lanud Baucau.
Iha diskursu abertura, Xefe Estadu-Maior-Jerál Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek”, hateten katak ezersísiu militár mak eskola importante ida ne’ebé transforma koñesimentu ba kompeténsia, tanba doutrina no fundamentu teóriku ne’ebé di’ak bele substitui esperiénsia direta iha terenu.
Nia esplika katak, liuhusi ezersísiu, militár sira bele aumenta koñesimentu, halo avaliasaun, dezenvolve abilidade atu foti desizaun no aprende atu sobrevive ho rekursu sira ne’ebé disponivel.
Nia kompara esperiénsia ne’e ho luta guerrilleiru FALINTIL sira nian, ne’ebé reziste iha kondisaun funu ne’ebé difísil, uza foho nu’udar abrigu, ai-laran nu’udar fatin sustentasaun no disiplina nu’udar sira-nia forsa.
“Hau fiar katak naran Matebian fó hanoin mai ita iha pasu ida-idak kona-ba folin husi ita-nia rezisténsia,” hateten Xefe Estadu-Maior-Jerál Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek” iha Lanud Baucau, Segunda (09/11/2026).
Iha oportunidade ne’e, Falur mós fó apresiasaun espesiál ba esforsu Komandu Komponente Terrestre nian iha dezenvolvimentu abilidade militár feto sira no atensaun ne’ebé fó ba inkluzaun no valorizasaun feto sira iha instituisaun laran.
Nia afirma katak Forsa Armada tenke investe iha membru hotu-hotu, tanba talentu sira sei hametin koezaun, kompeténsia no fidelidade ba memória feto sira ne’ebé iha tempu rezisténsia sai estafeta, enfermeira no kombatente.
Falur mós husu atu ezersísiu sira iha futuru bele hala’o iha rejiaun remota sira iha territóriu nasionál, hodi hakbesik F-FDTL ba populasaun, rekupera memória moris luta libertasaun nasionál no hametin ligasaun ho komunidade sira.
Nia hateten katak, senáriu ezersísiu sira tenke reflete dezafiu no risku reais ne’ebé nasaun bele hasoru iha futuru, liuliu ameasa la konvensionál ne’ebé ezije misaun sekundária no komplementár husi Forsa Armada.
Tanba ne’e, nia konsidera importante atu integra senáriu asisténsia umanitária, ajuda ba dezastre naturál no operasaun apoiu ba dame, ne’ebé tenke artíkula ho planeamentu militár ne’ebé konsistente.
“Ita-nia knaar mós atu transmite ba militár jerasaun foun doutrina rezisténsia no reziliénsia guerrilleiru FALINTIL nian. Ida-ne’e la’ós kona-ba nostaljia, maibé kona-ba métodu no karakter,” nia deklara.
Nia kontinua hateten katak, F-FDTL tenke sai instituisaun modernu no profisionál, nu’udar forsa proporsionál ne’ebé koñese didi’ak ninia abut, hatene aprende no halo buat barak, maibé nunka haluha orizonte no obrigasaun atu dignifika sakrifísiu erói nasionál sira nian.
“Ba partisipante sira, hau husu kompromisu, disiplina no kamaradajen. Ba komandante sira, hau ezije unidade, umildade no haraik-an. No ba imi hotu, hau husu atu kuidadu an iha atividade hotu-hotu. Ho liafuan sira-ne’e, hau loke Ezersísiu Matebian 26.02 hahú,” Falur deklara.
Iha fatin hanesan, Diretór Ezersísiu Matebian 26.02, Major Infantaria Pinto João ao Afonso, hateten katak Ezersísiu Matebian no Semana Sobrevivénsia nu’udar atividade operasionál importante atu aumenta kapasidade operasionál, protesaun, disiplina no espíritu kamaradajen militár sira iha nível eskuadra, seksaun, pelotaun no kompanhia.
“Liuhusi ezersísiu no treinu, mak ita bele hatene kapasidade morál, pasiénsia, espíritu sakrifísiu, tahan hamlaha, hamrook no kolen husi kada soldadu,” Major Pinto deklara.
Nia konsidera katak ezersísiu ne’e mós nu’udar oportunidade atu aprofunda no habelar koñesimentu iha terenu, nune’e membru sira bele aumenta abilidade no kapasidade profisionál, tantu individual no koletiva.
Nia mós enfatiza importánsia tátika kombate individuál no téknika infantaria, no aproveita oportunidade ne’e atu enkoraja partisipante hotu-hotu fó vontade no enerjia tomak durante semana preparasaun.
Entretantu, Ezersísiu Matebian 26.02 no Semana Sobrevivénsia ne’e sei hala’o durante semana rua iha fatin sira ne’ebé identifika ona.
(jen)
