DÍLI, STLTIMORLESTE.com – Prezidente Repúblika (PR), José Ramos-Horta husu estudante no traballadór Timoroan iha Korea-Súl atu kontinua estuda, servisu ho disiplina no promove Timor-Leste nia naran.
Prezidente Repúblika, José Ramos-Horta, husu estudante no traballadór Timoroan iha Korea-Súl atu mantein komportamentu di’ak, respeita kultura lokál no hatudu responsabilidade iha estudu no servisu.
Pedidu ne’e hato’o durante enkontru ho estudante no reprezentante traballadór Timoroan sira, organiza hosi Embaixada Timor-Leste iha Seul, lidera hosi Embaixadór António de Sá Benevides, Segunda-feira, 9 Novembru 2026.
Iha enkontru ne’e, Xefe Estadu esplika katak buka oportunidade servisu ba Timoroan iha Korea-Súl la’ós prosesu fasil, tanba Timor-Leste nu’udar nasaun foin hetan independénsia.
Nia relata katak, durante hala’o knaar nu’udar Ministru Negósius Estranjeirus, entre 2002 no 2006, nia inisia komunikasaun ho Governu Korea-Súl no kompañia sira atu loke oportunidade servisu ba traballadór Timoroan.
Inisiativa ne’e konsege lori kompañia ida hosi Korea-Súl simu traballadór Timoroan, no oportunidade ne’e kontinua to’o agora.
Ba traballadór Timoroan sira, Ramos-Horta husu atu servisu ho badinas, respeita kultura no kostume lokál, aumenta kapasidade profisionál no mantein komportamentu ne’ebé bele hametin konfiansa empregadór sira.
“Kontinua respeita ema nia kultura, kontinua servisu badinas, aumenta abilidade (skill), hatudu komportamentu di’ak.” dehan PR Horta.
Prezidente mós apela ba estudante Timoroan sira atu estuda maka’as, remata estudu tuir prazu no hatudu valor no identidade Timor-Leste iha mundu akadémiku.
(eme)
