DÍLI, STLTIMORLESTE.com – Dosente Universidade Nasionál Timor Lorosa’e (UNTL) kritika Governu tanba dezenvolvimentu estrada kontinua konsentra iha Dili, enkuantu área rurais seidauk hetan konektividade adekuada.
Preokupasaun ne’e hato’o husi dosente Fakuldade Siénsia Sosial (FCS) Universidade Nasionál Timor Lorosa’e (UNTL), Camilo Ximenes Almeida, ba STL, iha Kampus UNTL, Segunda-feira (9/11/2026).
Camilo Ximenes Almeida dehan, Governu kontinua fó prioridade ba konstrusaun no alargamentu estrada iha kapital Dili, enkuantu área rurais enfrenta problema infraestrutura ne’ebé seidauk di’ak.
Nia fó ezemplu katak, estrada husi Baguia ba Laga iha kondisaun di’ak, maibé asesu ba Baguia no área seluk seidauk hetan reabilitasaun adekuada.
Kondisaun estrada ne’ebé aat ne’e aumenta risku akidente no difikulta movimentu komunidade, liuliu bainhira sira presiza asesu ba servisu públiku.
Nia mós kestiona servisu emprezáriu sira ne’ebé simu responsabilidade atu konstrui estrada, tanba implementasaun projetu sira la’o neineik no seidauk hatudu progresu ne’ebé komunidade hein.
Tanba ne’e, nia husu entidade kompetente atu reforsa fiskalizasaun ba servisu empreiteiru sira, hodi asegura konstrusaun estrada tuir padraun no prazu ne’ebé determina.
Camilo esplika katak, konektividade estrada importante ba dezenvolvimentu nasionál, tanba presiza liga munisípiu, postu administrativu no suku sira.
“Área rurais kontinua abandona, laiha konektividade entre munisípiu. Ida-ne’e difikulta komunidade sira,” dehan Camilo.
Nia kontinua dehan katak, diskusaun kona-ba dezenvolvimentu dala barak foka ba orsamentu no persentajen, maibé ignora difikuldade ne’ebé komunidade enfrenta.
“Dala barak ita ko’alia kona-ba dezenvolvimentu, maibé Ministru sira haree de’it osan no persentajen,” nia afirma.
Nia hatutan katak, falta konektividade estrada limita movimentu komunidade no atividade ekonómika, liuliu iha área rurais ne’ebé presiza asesu ba suku no postu administrativu seluk.
Tanba ne’e, nia sujere ba Ministériu Obras Públikas (MOP) atu espande programa dezenvolvimentu infraestrutura estrada ba área rurais, la’ós konsentra de’it iha kapital Dili.
Nia enfatiza katak, estrada ne’ebé di’ak tenke liga munisípiu, postu administrativu no suku sira, hodi fasilita movimentu komunidade no promove dezenvolvimentu ekilíbradu.
Jornalista STL tenta konfirma asuntu ne’e ho Ministériu Obras Públikas (MOP), maibé seidauk hetan resposta tanba Ministru sei okupadu ho atividade no enkontru.
Jornalista mós husu oportunidade atu entrevista Ministru, maibé hetan informasaun katak Ministru sei iha enkontru.
Depois enkontru remata, jornalista kontinua buka Ministru iha fatin enkontru, maibé la konsege hasoru nia.
To’o notísia ne’e hakerek, Ministru seidauk disponivel atu fó klarifikasaun kona-ba preokupasaun ne’ebé hato’o husi dosente UNTL.
(joa)
