DÍLI, STLTIMORLESTE.com – Tribunal rona sasin kona-ba prosesu reabilitasaun moru rezidénsia Prezidente no Vise-Prezidente Parlamentu Nasionál (PN) iha Farol, tinan 2012.
Tribunál Judisiál Primeira Instánsia Dili (TJPID), Segunda-feira, 9 Novembru 2026, kontinua julgamentu kazu Parlamentu Nasionál ho agenda rona deklarasaun husi sasin Domingos.
Kazu ne’e envolve arguidu na’in tolu, ho inisiál LNdJAdC, JRA no HdRG. Ministériu Públiku (MP) akuza sira ho krime partisipasaun ekonómika no negósiu, relasiona ho preparasaun Bill of Quantity (BoQ) no adjudikasaun direta ba projetu reabilitasaun moru rezidénsia Prezidente no Vise-Prezidente PN iha Farol, tinan 2012.
Iha julgamentu, sasin Domingos deklara katak iha tinan 2012 nia servisu nu’udar enjenheiru, ho knaar fó asisténsia téknika ba ministériu no instituisaun sira, inklui verifikasaun ba dezeñu no BoQ projetu.
Sasin ne’e hatete katak nia partisipa iha verifikasaun ba moru rezidénsia, maibé la’ós nia mesak, tanba envolve mós kolega tékniku sira seluk.
Nia mós deklara katak, halo verifikasaun dala rua, maibé la lembra ona ho klaru detallu prosesu verifikasaun ne’ebé akontese tanba tempu naruk ona.
Relasiona ho monitorizasaun, sasin esplika katak ekipa tékniku foka liu ba item sira ne’ebé hetan ona aprovasaun no verifica progresu ezekusaun projetu iha terenu.
Bainhira progresu projetu seidauk atinje nivel ne’ebé planeadu, ekipa tékniku bele rekomenda redusaun ba proposta iha relatóriu.
Sasin Domingos deklara: “Dono projetu mak rekruta ema hodi prepara BoQ, depois lori ba sira atu halo verifikasaun. Hodi prepara kontratu servisu.
Sasin mós hatete katak, ekipa tékniku la’ós responsável direta ba preparasaun relatóriu, maibé halo verifikasaun ba progresu projetu iha terenu.
Kona-ba alterasaun dezeñu no BoQ, sasin deklara katak, sei lembra dokumentu bainhira haree nia asinatura, maibé la lembra detallu prosesu tomak.
Depois rona deklarasaun sasin, tribunal adia julgamentu ba loron seluk atu kontinua rona sasin sira seluk.
Tuir akuzasaun MP, arguidu LNdJAdC servisu nu’udar funsionáriu públiku iha PN desde tinan 2001.
Nia knaar inklui prepara relatóriu mensál kona-ba ezekusaun orsamentu, prosesu despeza, elabora planu orsamentu no atividade instituisaun, no hala’o prosedimentu aprovisionamentu.
Arguidu JRA servisu iha PN desde tinan 2007.
Enkuantu arguidu HdRG hahú harii empreza iha tinan 2010, ne’ebé hala’o atividade iha área konstrusaun, perfurasaun bee-moos no forne-simentu.
Tuir akuzasaun, iha planu orsamentu tinan fiskál 2012, Sekretariadu PN kompromete orsamentu US$80.000 atu reabilita moru rezidénsia Prezidente no Vise-Prezidente PN iha Farol.
Iha 14 Maiu 2012, Ofisiál Finansas PN, prosesa dokumentu CPV N.º 12PR200037A ho montante US$80.000, ne’ebé sertifika husi LNdJAdC no aprova husi JRA.
Orsamentu ne’e fahe ba projetu reabilitasaun moru rezidénsia Prezidente PN ho montante US$41.922,22 no rezidénsia Vise-Prezidente PN ho US$38.077,78. Maibé, tuir akuzasaun, projetu ba rezidénsia Vise-Prezidente la realiza.
Akuzasaun mós temi katak, liuhusi kontaktu entre JRA no tékniku EF iha Abril 2012, prepara dokumentu BoQ ba projetu reabilitasaun moru rezidénsia Prezidente PN.
Iha 31 Maiu 2012, EF prepara BoQ, lista análize presu unitáriu no kustu ba mão de obra ho montante US$29.094,63.
Dokumentu ne’e hetan sertifikasaun husi Xefe Konstrusaun Públika iha Ministériu Obras Públikas, HG, no aprovasaun husi Diretora Edifikasaun, RAV.
Julgamentu kazu ne’e sei kontinua ho rona deklarasaun husi sasin sira seluk.
(ter)
