DÍLI, STLTIMORLESTE.com – Tribunal iha loron Segunda, 09/11/2026, kondena FM ho multa US$ 30 tanba provadu halo agresaun fízika hasoru PSG iha Motael.
Iha loron 9 Novembru 2026, Juíza prosesu Maria Modesta kondena arguidu FM ho pena multa US$ 30, tanba komete krime ofensa integridade fízika simples hasoru lezadu PSG.
Iha sala julgamentu, FM konfesa integralmente faktus hotu-hotu ne’ebé Ministériu Públiku aprezenta iha akuzasaun. Tribunal konsidera faktus hirak ne’e provadu.
Tuir akuzasaun, akontesimentu ne’e akontese iha loron 19 Juñu 2024, iha Motael. FM halo agresaun hasoru PSG, tanba lezadu baku uluk arguidu nia feton.
Arguidu tuku lezadu dala rua, ida iha hasan parte karuk no ida iha hirus matan. Depois, kaer lezadu nia kabas, dudu ba kotuk no tebe dala haat iha parte kabun.
Konsekuénsia husi agresaun ne’e, PSG sofre moras iha hasan, hirus matan no kabun kidun, nune’e presiza hetan tratamentu médiku.
Ministériu Públiku konsidera katak, FM halo agresaun ho vontade livre, deliberada no konsiente, ho intensaun atu hakanek no hamoras ema seluk.
Juíza Maria Modesta aviza arguidu: “Iha futuru labele komete tan krime hasoru lezadu ka ema seluk.”
Tribunal aplika pena multa US$ 30 ba FM. Juíza mós aviza katak, se arguidu la selu multa, sei hetan prizaun alternativa durante loron 40.
Ministériu Públiku akuza FM ho krime ofensa integridade fízika simples, ne’ebé previstu no punível tuir artigu 145.º Kódigu Penál.
(ter)
