DILI, STLTIMORLESTE.com – Ekipa futebol mane Sub-17 Munisipiu Viqueque sei hasoru Dili Oeste iha final Kopa Juvenil U-17 2026, ne’ebé sei realiza iha quinta-feira, 12 Novembru, tuku 18:30, iha Kampu Futebol FFTL, Díli.
Assistant Coach ekipa Viqueque, Justino Baptista Brandão, hateten katak nia sente orgullu tanba bele reprezenta munisípiu Viqueque iha kompetisaun ne’e, no hato’o parabéns ba esforsu jogador hotu durante kompetisaun.
Nia esplika katak, preparasaun ekipa agora tama ona faze rekoperasaun, tanba jogador sira foin remata joga iha terça-feira. Treinu no atividade agora foka liu ba rekoperasaun atu asegura kondisaun físika jogador sira antes final.
Justino afirma katak, bazeia ba observasaun ba jogador titular no membru ekipa hotu, sira iha kondisaun físika no mental ne’ebé diak atu enfrenta Dili Oeste.
Nia mós rekoñese katak, Dili Oeste mak ekipa forte, tanba ne’e Viqueque prepara estratéjia hamutuk ho treinadór sira atu buka oportunidade no aproveita situasaun iha jogu.
Maski nune’e, nia kontinua otimista katak Viqueque bele hetan rezultadu diak. Nia subliña katak futebol la’ós de’it depende ba preparasaun, maibé sorte no oportunidade mós importante, tanba rezultadu final sei determina durante 90 minutu iha kampu.
(leo)
