DÍLI, STLTIMORLESTE.com – Prezidente Komité 12 de Novembro, Gregorio Saldanha husu povu Timor-Leste atu renova kompromisu unidade nasionál hodi hametin kooperasaun no dezenvolvimentu nasaun.
Mensajen ne’e hato’o husi Prezidente Komité 12 de Novembru, Gregorio Saldanha, durante selebrasaun komemorasaun Masakre Santa Cruz ba dala 35, iha Santa Cruz, Kinta (12/11/2026).
Gregorio Saldanha afirma katak rai Santa Cruz mak rai lulik, tanba iha fatin ne’e fakar raan husi mártires no povu Timor-Leste ne’ebé sakrifika sira-nia moris iha luta ba libertasaun nasional.
Nia esplika katak, raan ne’ebé fakar iha Santa Cruz sai parte importante husi istória luta povu Timor-Leste, hamutuk ho sakrifísiu husi ema barak ne’ebé iha tinan sira liubá kontribui ba prosesu atu hetan independénsia nasional.
Tanba ne’e, nia konvida povu Timor-Leste tomak atu halo renovasaun ba kompromisu unidade nasionál, tanba unidade ne’e importante tebes atu apoia servisu loroloron, liuliu iha prosesu dezenvolvimentu nasional ne’ebé nasaun no povu presiza.
Nia subliña katak, Timor-Leste hanesan uma boot ida ne’ebé halibur ema hotu, maski iha diferensa polítika, hanoin no pozisaun, maibé povu hotu kontinua sai família ida.
“Ita hanesan uma ida, maski kuartu ketak-ketak, maibé ita uma ida de’it. Família mártires, sobrevivente sira no povu tomak presiza dudu nafatin lider sira atu ko’alia malu,” Gregorio Saldanha afirma.
Nia mós apela ba lideransa hotu atu kontinua buka dalan diálogu no kooperasaun, hodi rezolve diferensa sira liuhusi ko’alia malu, la’ós hodi hametin divizaun.
Tuir nia, lider sira tenke hanesan família ida ne’ebé hela iha uma ida, maski ida-idak iha kuartu diferente, maibé sira tenke bele tuur hamutuk iha kadeira ida atu ko’alia no buka solusaun ba nesesidade povu.
Ikus mai, Gregorio Saldanha enfatiza katak unidade nasionál mak sentidu importante husi sakrifísiu mártires sira ne’ebé mate iha Santa Cruz. Tanba ne’e, povu no lideransa hotu tenke kontinua hametin unidade ne’e ba futuru nasaun.
(joa)
