FILIPINA, STLTIMORLESTE.com – Diretora Jerál Operasaun Mídia Simeira ASEAN 2026, Hazel Abad, aprezenta fasilidade Sentru Mídia Internasionál ba jornalista rejistadu besik 2.000.
Abad halo aprezentasaun ne’e iha Sentru Mídia Internasionál, Filipina, Kinta-feira (12/11/2026), atu simu delegasaun no jornalista sira ne’ebé sei halo kobertura ba Simeira ASEAN dala 49.
Nia hateten katak, sentru ne’e prepara fasilidade oioin atu apoia jornalista lokál no internasionál durante sira-nia servisu kobertura ba eventu rejionál ne’e.
Iha sentru mídia ne’e, disponivel sala boot haat, mak Sala A, B, C no D, inklui sala briefing ki’ik no médiu.
“Ami iha jornalista rejistadu besik 2.000 ne’ebé sei uza fasilidade iha Sentru Mídia Internasionál ne’e,” Hazel Abad esplika.
Nia hatutan katak, organizadór sira mós prepara programa bem-estar, inklui servisu masaže, atu jornalista sira bele deskansa durante atividade kobertura.
“Ami komprende katak jornalista barak sente estresadu tanba sira la iha tempu atu sai ba liur no hakerek notísia,” nia dehan.
Programa ne’e inklui mós vizita turístika badak ho itineráriu ba fatin interesante sira iha Manila no área seluk, atu jornalista sira bele koñese kultura no esperiénsia Filipina.
Aleinde ne’e, Departamentu Turizmu prepara programa aprezentasaun kafé lokál Filipina, atu jornalista sira bele koko no koñese produtu lokál.
“Ami hakarak promove kafé lokál Filipina no fahe esperiénsia ne’e ho jornalista sira, inklui maluk Timor-Leste ne’ebé mós iha kafé di’ak,” nia hatutan.
Sentru mídia ne’e mós disponibiliza estúdiu podcast, sala mídia prinsipál no fatin espesífiku ba jornalista sira halo reportagem direta (stand-up reporting).
Abad esplika katak, fasilidade hirak ne’e prepara atu ajuda jornalista mídia komersiál no lokál hala’o entrevista no transmisaun direta ho fasilidade ne’ebé kompletu.
Iha Sala A, organizadór sira prepara estúdiu televizaun ho ekipamentu kompletu, inklui kámara no iluminasaun, ba Xefe Estadu sira ne’ebé hakarak fó entrevista direta.
Sentru ne’e mós iha sentru kontrolu prinsipál ne’ebé simu sinal transmisaun direta husi sala reuniaun sira, no kabina servisu independente ba jornalista.
Aleinde fasilidade mídia, organizadór sira prepara Pinoy Kalye, hanesan réplica ki’ik hosi área istórika Intramuros, atu jornalista sira bele sente ambiente tradisionál Filipina.
Iha fatin ne’e, jornalista sira bele haree no koko hahán tradisionál no ai-han lokál ne’ebé normalmente fa’an iha dalan.
Iha Sala D, disponivel loja produtu lokál liuhusi programa One Town, One Product, ne’ebé oferese lembransa no souvenir husi rejiaun oioin iha Filipina.
“Ami lori produtu lokál sira mai iha sentru mídia, atu jornalista sira bele sosa lembransa iha fatin ida de’it,” nia koalia.
Atu fasilita transasaun, organizadór sira mós disponibiliza servisu troka osan estranjeiru no pagamentu liuhusi kartaun kréditu.
Programa gastronomia mós sai parte hosi atividade ne’e, ho aprezentasaun hahán tradisionál husi illa prinsipál tolu Filipina, mak Luzon, Visayas no Mindanao.
Jornalista sira sei hetan oportunidade atu koko hahán karakterístiku husi rejiaun hirak ne’e, inklui liuhusi programa Slow Food.
Iha programa Slow Food, jornalista sira bele observa diretamente prosesu preparasaun hahán tradisionál Filipina, inklui hahán piaya.
Jornalista Timor-Leste na’in neen, hamutuk ho reprezentante mídia Governu no privadu, partisipa iha vizita ne’e atu observa preparasaun no fasilidade sira ne’ebé organizadór disponibiliza.
Programa Slow Food ne’e promove preparasaun hahán tradisionál ho kuidadu no domin, husi hili ingrediente to’o prosesu te’in.
Depois atividade gastronomia, jornalista sira bele uza sala hahán prinsipál ne’ebé organizadór disponibiliza gratuitamente ba jornalista hotu.
Abad afirma katak, fasilidade no programa hirak ne’e nu’udar parte hosi esforsu Filipina atu fó ospitalidade ba jornalista lokál no internasionál.
Sentru Mídia Internasionál ne’ebé lokaliza iha World Trade Center prepara ona atu simu jornalista sira ne’ebé rejista ba kobertura Simeira ASEAN dala 49.
(jen)
