DÍLI, STLTIMORLESTE.com – Prezidente Asosiasaun Futebol Dili Leste, Aleixo Cobra, husu Federasaun Futebol Timor-Leste (FFTL) atu kontinua organiza kompetisaun futebol Juvenil Sub-17 kada tinan, hodi identifika no dezenvolve talentu foun iha futuru futebol Timor-Leste.
Aleixo Cobra hateten ida-ne’e ba jornalista sira iha Kampu Futebol FFTL, Díli, kuarta-feira (11/11/2026), depois ekipa futebol feto Sub-17 Dili Leste manán ekipa Manufahi ho rezultadu 7-0 iha final Kopa Juvenil U-17.
Nia hato’o agradese ba FFTL tanba organiza kompetisaun ne’e no konsidera katak torneiu juvenil tenke kontinua, atu fó oportunidade ba atleta joven sira atu hatudu sira-nia kapasidade.
“Obrigadu barak ba federasaun futebol ne’ebé realiza jogu tinan-tinan U-17. Hau hanoin kompetisaun ne’e labele para, tenke kontinua nafatin atu ita bele hetan bibit ne’ebé di’ak liu tan. Buat ida manán ka lakon, ne’e normal iha futebol. Bainhira kopa ne’e kontinua, signifika katak jogador barak sei mosu mai,” nia deklara.
Aleixo Cobra hatutan katak, prosesu kompetisaun Kopa Juvenil U-17 lao ho di’ak no tuir regulamentu futebol internasionál, inklui regra sira ne’ebé FIFA no AFC determina.
“Kompetisaun ne’e lao kapas, lao normal tuir regra FIFA no AFC nian. Buat hotu-hotu lao di’ak,” nia afirma.
Iha parte seluk, nia mós afirma katak preparasaun ekipa Dili Leste sei kontinua ho intensidade máximu, la’ós de’it ba Sub-17, maibé mós ba Sub-15, hodi prepara atleta sira ba kompetisaun sira iha futuru.
Nia hateten katak, Dili Leste sei kontinua servisu hamutuk ho FFTL, tanba fiar katak federasaun iha programa barak ba dezenvolvimentu futebol juvenil Sub-15 no Sub-17, atu hasa’e kualidade no fó dalan ba jerasaun foun iha futebol Timor-Leste.
(leo)
