DÍLI, STLTIMORLESTE.com – Iha komemorasaun ba dala 35 Masakre Santa Cruz, Governu husu povu atu reflete no hametin nafatin unidade nasional iha Timor-Leste.
Mensajen ne’e hato’o husi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, durante selebrasaun komemorasaun Masakre Santa Cruz ba dala XXXV, iha Jardim Memória Santa Cruz, Kinta (12/11/2026).
Mariano Assanami Sabino afirma katak, loron 12 Novembru la’ós loron feriadu, maibé loron ne’ebé fó oportunidade ba povu Timor-Leste tomak atu halo refleksaun no hanoin fila-fali sakrifísiu boot ne’ebé akontese iha 12 Novembru 1991.
“Ita hotu, prosesu ne’ebé difisil iha momentu ne’ebá, 12 Novembru 1991, la’ós loron feriadu, maibé loron ne’ebé fó espasu ba ita atu halo refleksaun, atu hanoin nafatin sakrifísiu iha loron 12 Novembru 1991,” dehan Mariano Asanami Sabino.
Nia kontinua esplika katak, komemorasaun ida-ne’e sai oportunidade importante ba juventude, estudante, família, inan-aman no povu tomak atu komprende katak unidade nasionál ne’ebé Timor-Leste hetan ohin loron, sosa ho sakrifísiu, raan no ruin husi heróis no mártires sira.
Tanba ne’e, nia husu juventude no família sira atu kontinua valoriza istória luta libertasaun nasionál, liu liu sakrifísiu husi sira ne’ebé lakon sira-nia moris iha luta ba independénsia.
Nia mós lembra katak, to’o ohin loron, restu mortál husi vítima balun seidauk hetan no halibur iha fatin ida.
Maibé, Jardim Memória Santa Cruz kontinua sai fatin importante ba povu atu vizita, hanoin no fó onra ba sakrifísiu sira ne’ebé akontese.
Iha okaziaun ne’e, Mariano Assanami Sabino apela ba juventude, família no Timoroan hotu-hotu, ne’ebé hela iha rai laran no rai li’ur, atu kontinua hametin kompromisu hodi fó onra ba sira ne’ebé sakrifika sira-nia moris ba nasaun.
Nia enfatiza katak, maski Timoroan sira iha partidu polítiku no organizasaun oioin, unidade nasionál tenke kontinua metin, tanba povu Timor-Leste hotu-hotu mak nasaun ida ho objetivu komún atu lori rai ida-ne’e ba dezenvolvimentu no prosperidade.
“Ita nafatin kor ida de’it, ita nafatin Timoroan ida de’it, ho objetivu ida de’it atu kontinua luta ba prosperidade povu no rai ida-ne’e,” nia afirma.
Ikus mai, nia apela ba sidadaun hotu atu transforma memória Masakre Santa Cruz sai hanesan kompromisu ba jerasaun ohin no futuru, hodi kontinua harii unidade, dame no dezenvolvimentu iha Timor-Leste.
(joa)
