DILI, STLTIMORLESTE.com – Jeneral Reformadu, Tito da Costa Cristóvão Lere Anan Timur dehan, unidade nasionál, patriotizmu, disiplina no partisipasaun sidadaun sai elementu importante atu hametin nasaun no harii futuru Timor-Leste (TL) ne’ebé di’ak liután.
Deklarasaun nee hatoo husi Tenente Jeneral Reformadu, Tito Da Costa Cristóvão Lere Anan Timur, bainhira partisipa iha serimonia Komemorasaun Loron Nasionál Juventude Timor-Leste ba dala 21 no Selebrasaun tinan 35, loron masakre Santa Cruz 12 Novembru tinn 1991-2026 iha Semitériu Santa Cruz Dili, ba jornalista sira, Kinta-feira (12/11/2026).
Nia subliña katak, iha prosesu dezenvolvimentu nasaun, povu presiza iha esperansa, moral no kompromisu atu hametin unidade, promove servisu públiku no asegura futuru jerasaun tuir mai.
Tito da Costa Cristóvão mós temi katak, korrupsaun no nepotizmu sai dezafiu ne’ebé presiza hetan atensaun sériu. Tanba ne’e, organizasaun ne’ebé di’ak, jestaun transparente no responsabilidade iha servisu públiku importante tebes atu harii konfiansa povu.
Nia mós konsidera katak, partisipasaun sidadaun iha prosesu dezenvolvimentu no vida nasionál presiza kontinua hametin, tanba futuru nasaun la depende de’it ba lideransa, maibé mós depende ba kontribuisaun no envolvimentu husi sidadaun hotu.
Ho hanoin ne’e, esperansa ba futuru presiza akompaña ho asaun konkretu, responsabilidade no servisu ne’ebé fó prioridade ba interese povu.
(jos)
