JAKARTA, STLTIMORLESTE.com – Vise-Prezidente Indonézia, Gibran Rakabuming Raka, entrega karta renúnsia husi kargu Vise-Prezidente ba lideransa Majelis Permusyawaratan Rakyat (MPR), iha Jakarta, Kinta-feira (12/11/2026).
Gibran, tinan 39, ne’ebé mak oan mane husi eis Prezidente Indonézia Joko Widodo, foti desizaun ne’e iha momentu kontroversa kona-ba nia dokumentu edukasaun no kualifikasaun atu okupa kargu Vise-Prezidente.
Tuir informasaun husi media internasionál, Gibran entrega karta renúnsia diretamente ba lideransa MPR, depois nia mós entrega karta hanesan ba Prezidente Prabowo Subianto.
Kontroversa kona-ba dokumentu edukasaun Gibran mosu depois Tribunal Konstitusionál no Tribunal Supremu Indonézia, iha fulan Outubru 2026, foti desizaun kona-ba dokumentu edukasaun iha rai li’ur ne’ebé uza atu kumpre rekizitu kandidatura Vise-Presidente.
Situasaun ne’e mos lori membru Parlamentu Indonézia hamutuk 120 husi partidu polítiku ualu atu asina petisaun kona-ba prosesu polítiku ne’ebé bele lori ba destituisaun Gibran.
Prezidente MPR, Ahmad Muzani konfirma katak, Gibran entrega ona karta renúnsia no husu instituisaun ne’e atu prosesa nia pedidu.
Bazeia ba Konstituisaun Indonézia, bainhira iha vaga kargu Vise-Prezidente, la presiza realiza eleisaun foun. Prezidente Prabowo Subianto tenke propoin kandidatu na’in rua, no MPR hili substitutu iha prazu loron 60 nia laran.
Renúnsia Gibran sai akontesimentu polítiku importante iha Indonézia, tanba nia sai Vise-Prezidente primeiru ne’ebé renúnsia antes remata mandatu, desde reforma demokrátika hahú iha tinan 1998.
(leo)
