DÍLI, STLTIMORLESTE.com – Prezidente Repúblika (PR), José Ramos-Horta kondekora Prezidente Fransa, Emmanuel Macron, ho Grande Colar da Ordem de Timor-Leste, iha Palásiu Élysée.
Iha loron Kinta, 12 Novembru 2026, Prezidente Repúblika Timor-Leste, José Ramos-Horta, fó kondekórasaun aas liu nasaun nian ba Prezidente Fransa, Emmanuel Macron, nu’udar rekoñesimentu ba nia kontribuisaun diplomátika.
Kondekórasaun ne’e hala’o tuir Dekretu Prezidente Repúblika Nú. 136/2026, loron 5 Novembru, hodi rekoñese esforsu Macron nian hametin relasaun amizade no kooperasaun bilaterál.
Grande Colar da Ordem de Timor-Leste mak distinsaun aas liu nasaun nian, ne’ebé destina ba xefe estadu husi nasaun soberanu sira.
Durante nia mandatu, Macron kontinua apoia Timor-Leste nia adezaun ba Asosiasaun Nasaun Sudeste Aziátiku (ASEAN), no promove kooperasaun iha ekonomia, infraestrutura no enerjia renovável.
Kooperasaun entre nasaun rua mós inklui programa formasaun no kapasitasaun rekursu umanu, hametin diálogu polítiku no dezenvolve parseria bilaterál.
Iha ninia deklarasaun, Ramos-Horta hato’o agradese ba Macron nia amizade no apoiu ba Timor-Leste.
Ramos-Horta deklara:
“Ha’u sente onradu kondekora Prezidente Emmanuel Macron, nu’udar rekoñesimentu ba ninia amizade no apoiu metin ba ita-nia nasaun.”
Prezidente Ramos-Horta konsidera kondekórasaun ne’e hanesan símbolu solidariedade, respeitu mútuu no amizade kle’an entre povu Timor-Leste no Fransa.
Macron, ne’ebé moris iha Amiens, Fransa, iha 21 Dezembru 1977, eleitu nu’udar Prezidente Repúblika Fransa nian dala primeiru iha Maiu 2017.
Nia hetan mandatu prezidensiál daruak iha Abril 2022, depois manán eleisaun prezidensiál hasoru Marine Le Pen.
Antes tama iha kargu prezidente, Macron servisu nu’udar Ministru ba Ekonomia, Indústria no Asuntu Dijitál, entre 2014 no 2016.
(eme)
