BOBONARO, STLTIMORLESTE.com — Munisípiu Bobonaro kontinua enfrenta kazu kriminál no movimentu sasán ilegál iha fronteira, enkuantu limitasaun rekursu no transporte sai obstákulu ba operasaun PNTL.
Komandante PNTL Munisípiu Bobonaro, Superintendente Xefe Polísia Damião da S. Correia, hatete katak husi Janeiru to’o Novembru, polísia rejista kazu kriminál oioin, inklui ofensa integridade fízika simples no maus-tratus.
Aleinde kazu hirak ne’e, nia mós konfirma omisídiu ida ne’ebé akontese iha Suku Raiheu, Postu Administrativu Kailaku. Suspeitu kazu ne’e agora iha ona prizaun.
“Akontesimentu omisídiu ida ne’e akontese iha Kailaku, Suku Raiheu, no suspeitu agora iha ona prizaun,” Superintendente Xefe Polísia Damião dehan ba Jornalista sira, iha nia knaar fatin, Komando PNTL Munisipiu Bobonaro, Sesta (13/11/2026).
Iha kontrolu seguransa, Komandante esplika katak prosesu kaptura suspeitu depende ba mandatu husi Ministériu Públiku no Tribunal. Maibé, distánsia entre suku sira no limitasaun transporte dala ruma difikulta operasaun.
“Dalaruma rekursu menus, liuliu transporte, ne’ebé sai obstákulu ba ami atu hala’o operasaun iha área sira ne’ebé dook,” nia esplika.
Situasaun fronteira mós kontinua sai preokupasaun ba PNTL, tanba movimentu sasán husi rai-li’ur ne’ebé tama liuhusi dalan ilegál. Sasán ne’ebé polísia prende inklui bebida, sigaru, mina, minarai no gasóleu.
Tuir Damião, movimentu ne’e aumenta liuliu bainhira besik Natál no Tinan-Foun. Dalan fronteira rai maran mós fasilita ema tama-sai entre nasaun rua.
“Sigaru no bebida, liuliu Sprite no Coca-Cola, mak sasán ne’ebé barak liu tama liuhusi fronteira,” nia hatete.
Nia mós refere katak ema balun lori sasán hirak ne’e iha kalan, atu fa’an ba kios sira iha territóriu laran.
Durante operasaun, PNTL konsege prende mina no gasóleu iha jerrican ho kapasidade 10 to’o 20 litru, inklui animál moris hanesan fahi no fugetes.
Komandante afirma katak sasán hotu ne’ebé prende aprezenta ba Ministériu Públiku, atu kontinua prosesu tuir prosedimentu legál.
Iha parte seluk, Observador Polítika, Antonio Magno liu husi telefone hatete katak, problema seguransa iha Bobonaro la limita de’it ba movimentu ilegál iha fronteira, maibé mós envolve konflitu sosiál iha komunidade.
Nia konsidera katak kazu ofensa integridade fízika simples no maus-tratus hatudu nesesidade, atu Governu no instituisaun relevante fó atensaun ba prevensaun konflitu iha komunidade.
“Kona-ba fronteira ilegál, ita labele haree de’it husi sorin prende no kaer. Ema tama-sai liuhusi dalan ilegál tanba buka moris. Tanba ne’e, solusaun la’ós de’it aumenta polísia, maibé tenke kria alternativa ekonomia ba komunidade fronteira,” Antonio Magno dehan.
Entretantu Akademista UNPAZ, Manuel Sarmento hatete, Governu presiza hametin kapasidade PNTL liuhusi apoiu transporte, orsamentu no formasaun, atu polísia bele hala’o knaar ho efetivu.
“Se ita hakarak PNTL serbisu di’ak, ita tenke fó transporte, orsamentu no formasaun. La bele husu de’it PNTL atu halo hotu, maibé la fó kbiit ba sira. Komunidade mós tenke kolabora no labele taka matan ba atividade ilegál,” nia enfatiza.
Tuir nia, kontrolu fronteira presiza akompaña ho oportunidade ekonomia ba komunidade, atu seguransa no dezenvolvimentu bele lao hamutuk.
(car)
