BOBONARU, STLTIMORLESTE.com —Governu kontinua fó prioridade ba investimentu infraestrutura no dezenvolvimentu rekursu umanu, inklui aumenta orsamentu bolsa estudu ba estudante sira, iha nasaun ne’e.
Sekretariadu Estadu Komunikasaun Sosiál (SEKOMS) realiza atividade Meet The Press iha Bobonaro, ho tema Investimentu Nasionál no Dezenvolvimentu Infraestrutura iha Timor-Leste.
Iha atividade ne’e, Ministru Planeamentu no Investimentu Estratéjiku, Gastão Francisco de Sousa, esplika prioridade Governu nian iha investimentu públiku, liuliu iha infraestrutura no dezenvolvimentu rekursu umanu.
Nia hahú ho agradese ba autoridade munisipál, Komandante PNTL, diretór instituisaun sira no partisipante ne’ebé marka prezensa iha enkontru ne’e.
Ministru mós hato’o agradese ba Sekretária Estadu ba Asuntu Sosiál no Igualdade, ne’ebé akompaña no fó apoiu ba atividade Meet The Press.
Iha esplikasaun kona-ba investimentu públiku, Ministru refere ba infraestrutura hanesan área importante atu apoia atividade ekonómika no hadi’a asesu ba komunidade.
Setór hirak-ne’ebé Governu fó atensaun inklui saneamentu, estrada, eletrisidade, edifísiu públiku no transporte.
Nia esplika katak investimentu iha infraestrutura la’ós de’it atu harii konstrusaun, maibé mós atu kria kondisaun ne’ebé fasilita komunidade dezenvolve atividade ekonómika.
“Bainhira komunidade ida seidauk iha estrada di’ak, atividade ekonomia no negósiu sira sei difisil atu dezenvolve,” Ministru Gastão de Sousa dehan iha meet the press, neebe halao iha salaun Maria Tapo Munisipiu Bobonaro, Sesta (13/11/2026).
Nia hatutan katak estrada di’ak bele fasilita transporte, movimentu ema no transportasaun produtu husi área ida ba área seluk.
Ho asesu ne’ebé di’ak, komunidade iha oportunidade atu loke kioske, loja no negósiu ki’ik sira, ne’ebé bele apoia ekonomia lokál.
Ministru mós konsidera katak implementasaun projetu infraestrutura presiza envolve autoridade lokál, atu prosesu dezenvolvimentu bele la’o ho di’ak.
Aleinde infraestrutura, Ministru mós fó atensaun ba dezenvolvimentu rekursu umanu liuhusi Fundu Dezenvolvimentu Kapitál Umanu (FDCH).
Fundu ne’e harii iha 2011, ho objetivu atu dezenvolve kapasidade, koñesimentu no kualifikasaun sidadaun Timor-Leste.
Nia argumenta katak rikusoin prinsipál nasaun ida la’ós de’it rekursu naturál, maibé mós ema ne’ebé iha koñesimentu no abilidade atu kontribui ba dezenvolvimentu.
Ministru uza Singapura no Coreia do Sul nu’udar ezemplu nasaun ne’ebé investe iha edukasaun no formasaun rekursu umanu, atu hametin ekonomia.
Nia mós temi Cabo Verde, ne’ebé sidadaun sira hetan esperiénsia no formasaun iha rai li’ur, no bele lori koñesimentu ne’e fila mai atu kontribui ba nasaun.
Iha kontestu Timor-Leste, nia konsidera katak traballadór sira ne’ebé servisu iha estranjeiru bele hetan esperiénsia no abilidade foun.
“Traballadór sira ne’ebé hetan formasaun no kualifikasaun di’ak, bele aumenta produtividade no apoia investimentu iha nasaun,” nia dehan.
Kona-ba bolsa estudu, Ministru esplika katak Governu kontinua aloka orsamentu, atu apoia dezenvolvimentu rekursu umanu.
Nia apela ba estudante no família sira atu prepara an, no buka informasaun kona-ba oportunidade bolsa estudu ne’ebé disponivel.
Ministru mós hatete katak estudante husi munisípiu hotu iha oportunidade atu kandidata, desde sira kumpre kritériu no iha kapasidade.
“Bolsa estudu la’ós atu simu de’it. Tenke iha kompetisaun no prosesu seleksaun ne’ebé bazeia ba méritu,” nia subliña.
Nia husu estudante sira atu estuda ho seriedade no prepara an, atu bele aproveita oportunidade ne’ebé Governu oferese.
Ministru hateten katak objetivu prinsipál mak atu forma rekursu umanu kualifikadu, kompetente no prontu atu kontribui ba dezenvolvimentu Timor-Leste.
Iha atividade Meet The Press nee, Xefe Redasaun DMF, Ligia Noronha, hato’o pergunta ba Ministru kona-ba esforsu Governu nian atu diversifika ekonomia nasionál no hamenus dependénsia ba Fundu Minarai.
Nia husu kona-ba medida konkretu ne’ebé Governu implementa ona durante tinan tolu ikus atu diversifika ekonomia, no setór estratéjiku saida mak Governu konsidera prioridade atu dezenvolve.
Nune’e Timor-Leste bele iha fonte rendimentu seluk, no la depende liu ba rekursu petróleu de’it.
Entretantu, jornalista Liliani Trindade Gonçalves, husi media MFTV, hato’o pergunta kona-ba investimentu Governu iha área bee-moos.
Nia konsidera katak, maski Estadu halo investimentu iha setór ne’e, komunidade iha munisípiu balu, inklui kapital Díli, kontinua enfrenta problema asesu ba bee-moos.
Tanba ne’e, nia husu Ministru kona-ba oinsá Governu avalia investimentu ne’ebé realiza ona no medida saida mak sei foti, atu garante komunidade sira hetan asesu ba bee-moos.
(car)
