DÍLI, STLTIMORLESTE.com – Federasaun Futebol Timor-Leste (FFTL) hetan aprovasaun husi Komité Dezenvolvimentu FIFA ba projetu reabilitasaun no espansaun Estadiu Munisipál Díli, ho orsamentu besik US$ 5,127,000.
Prezidente FFTL, Nilton Gusmão hateten katak, aprovasaun ne’e sai hanesan etapa importante ba dezenvolvimentu futebol Timor-Leste, tanba sei fó oportunidade ba seleksaun nasionál atu hala’o kompetisaun internasionál iha rai rasik.
Nilton Gusmão hato’o informasaun ne’e ba jornalista sira iha sala konferénsia FFTL, Díli, Sesta-feira (13/11/2026). Nia hamutuk ho Sekretáriu Jerál, membru ezekutivu, diretór infraestrutura no diretór seleksaun nasionál.
Nia esplika katak, durante prosesu preparasaun, departamentu infraestrutura hamutuk ho ekipa téknika no lideransa FFTL prepara proposta no estudu tékniku atu aprezenta ba FIFA, tuir nesesidade futebol Timor-Leste no padraun FIFA no AFC.
“Ida ne’e momentu importante tebes ba ita nia futebol, tanba mehi naruk ne’ebé ita iha atu lori kompetisaun internasionál mai Timor-Leste, agora besik atu sai realidade. Ami agradese ba FIFA tanba apoiu ne’e,” hateten Nilton Gusmão.
Nia aumenta katak, durante tinan ida ho balun tuir mai, bainhira konstrusaun remata, Timor-Leste bele simu kompetisaun internasionál iha rai rasik, ho apoiu diretamente husi adeptu no komunidade futebol nian.
Nilton subliña katak, joga hanesan anfitriaun iha rai rasik sei fó motivasaun adisionál ba jogadór sira, tanba apoiu no entuziazmu husi adeptu sira bele sai hanesan forsa adisionál ba seleksaun nasionál.
Nia mos informa katak, FFTL iha planu atu dezenvolve infraestrutura seluk, inklui konstrusaun estadiu foun, tanba Estadiu Munisipál Díli ida de’it la sufisiente atu responde ba nesesidade dezenvolvimentu futebol nasionál.
“Objetivu ami nian mak transforma futebol sai organizasaun nasionál ne’ebé forte, ho infraestrutura adekuada atu bele dezenvolve futebol no organiza kompetisaun internasionál iha Timor-Leste,” nia afirma.
Iha parte seluk, Sekretáriu Jerál FFTL informa katak montante orsamentu ba projetu rehabilitasaun no espansaun Estadiu Munisipál Díli hamutuk besik US$5,127,000.
Membru Ezekutivu FFTL, José Luís de Oliveira, hateten katak prosesu tenderizasaun hahú ona, ho kompanhia tolu partisipa iha kompetisaun atu hetan kontratu konstrusaun.
Nia esplika katak, depois de prosesu avaliasaun, kompanhia husi Xina, hetan vitória iha prosesu selesaun kontratór.
Tuir José Luís, konstrusaun ne’e inicialmente planeia atu hahú iha fulan Novembru 2026, maibé agora hein remata ajenda Festival Nasionál Desportu (FND) no halo enkontru tékniku ho kompanhia antes hahú servisu.
Ho aprovasaun no apoiu husi FIFA, FFTL hein projetu ne’e bele realiza tuir padraun tékniku ne’ebé prepara ona, hodi haforsa infraestrutura no futuru futebol Timor-Leste.
(leo)
