Ramos-Horta Kondekora Juiz Mohamed Abdelsalam ho Kolár Ordem TL

DILI, STLTIMORLESTE.com – Prezidente Repúblika (PR), José Ramos-Horta kondekora Juiz Mohamed Abdelsalam ho Kolár Ordem Timor-Leste (TL), nu’udar rekoñesimentu ba kontribuisaun destakada iha promosaun fraternidade umana no diálogu inter-relijiozu.

Prezidente Repúblika José Ramos-Horta fó Kolár Ordem Timor-Leste ba Juiz Mohamed Abdelsalam, Sekretáriu-Jerál Prémiu Zayed ba Fraternidade Umana, tuir Dekretu Prezidente Repúblika Nú. 134/2026.

Tuir dekretu ne’ebé STL asesu Tersa 17/11/2026 hatete Kondekorasaun ne’e rekoñese Abdelsalam nia kontribuisaun signifikativa ba promosaun fraternidade umana, toleránsia, koezisténsia pasífika no aproximasaun entre povu no kultura sira.

Juiz Mohamed Abdelsalam mak peritu jurídiku ne’ebé servisu nu’udar Sekretáriu-Jerál Prémio Zayed ba Fraternidade Umana hahú hosi 2019.

Nia mós kontribui ba elaborasaun Dokumentu Fraternidade Umana, ne’ebé Papa Francisco no Grande Imám Al-Azhar asina iha Abu Dhabi, loron 4 Fevereiru 2019.

Aleinde ne’e, Abdelsalam lidera Komité Superiór Fraternidade Umana no servisu nu’udar Sekretáriu-Jerál Konsellu Muçulmanu ba Ansião sira, no Ko-Prezidente Relijiaun ba Pás.

Prezidente Ramos-Horta hateten katak kondekorasaun ne’e reprezenta rekoñesimentu ba servisu ne’ebé dedika ba promosaun fraternidade, diálogu no pás entre povu sira.

“Hodi fó onra ba Juiz Mohamed Abdelsalam, ita rekoñese moris ida ne’ebé dedika ba fraternidade entre povu hotu, diálogu entre fiar no kultura sira, no buka pás.” Dehan Horta.

Prezidente Ramos-Horta mós afirma katak Abdelsalam nia servisu reflete espíritu solidariedade no komprensaun, ne’ebé sai valór importante ba Timor-Leste nu’udar nasaun ne’ebé harii hosi rekonsiliasaun no esperansa.

Abdelsalam nia kontribuisaun internasionál inklui promosaun koezisténsia pasífika entre komunidade relijioza, defeza direitus umanus no liberdade relijioza.

Timor-Leste iha 2022 sai nasaun dahuluk ne’ebé adopta formalmente Dokumentu Fraternidade Umana nu’udar parte hosi ninia valór nasionál sira.

Prezidente Ramos-Horta mós servisu ona iha Komisaun Juízes Prémio Zayed no partisipa iha serimónia no Majlis Fraternidade Umana iha Abu Dhabi.

(eme)

Share it :

Leave a Reply

Your email address will not be published. Required fields are marked *