Horta Apoiu Kandidatu PR Husi CNRT – PD

Prezidente Republika (PR), Jose Ramos Horta. (Foto: Media PR)

DÍLI, STLTIMORLESTE.com – Prezidente Repúblika (PR), José Ramos-Horta afirma sei apoia kandidatu Prezidente Repúblika hosi CNRT ka PD ba eleisaun prezidensiál 2027, se kandidatu ne’e iha kualidade.

Xefe Estadu hato’o deklarasaun ne’e ba jornalista sira, iha Aeroportu Internasionál Prezidente Nicolau Lobato, Komoro, Dili, Tersa (17/11/2026).

Ramos-Horta esplika katak, nia desizaun atu fó apoiu bazeia ba relasaun polítika no apoiu ne’ebé partidu CNRT, PD no KHUNTO fó ba nia durante nia mandatu iha Prezidénsia Repúblika.

“Se iha kandidatu di’ak hosi CNRT, mane ka feto, ka hosi PD, ha’u sei fó apoiu 100%,” Prezidente Ramos-Horta afirma.

Nia hatutan katak, apoiu ne’e la depende ba jéneru kandidatu, maibé ba kandidatu ne’ebé Primeiru-Ministru Kay Rala Xanana Gusmão no partidu sira hili.

Prezidente mós informa katak, nia sei foti desizaun kona-ba possibilidade atu kandidata fali ba eleisaun prezidensiál 2027 iha semana ida ka rua tuirmai.

“Ha’u sei foti desizaun kona-ba kandidata aan iha semana ida ka rua tan. Ha’u la stres ho ne’e,” nia dehan.

Ramos-Horta afirma katak, se Primeiru-Ministru deside atu apoia kandidatu feto ka mane hosi CNRT, nia sei kontinua fó apoiu ba kandidatu ne’e.

Nia deklarasaun ne’e mosu hafoin Primeiru-Ministru Kay Rala Xanana Gusmão manifesta nia pozisaun pesoál atu apoia feto ida kandidata ba Prezidente Repúblika iha eleisaun 2027.

Eleisaun Prezidensiál 2027 sei determina Prezidente Repúblika ba períodu mandatu tuir mai. Debate kona-ba kandidatura no apoiu hosi partidu polítiku sira hahú sai asuntu diskusaun iha lideransa polítika nasionál.

Prezidente José Ramos-Horta seidauk anunsia desizaun finál kona-ba possibilidade atu kandidata fali ba mandatu tuir mai, tuir deklarasaun ne’ebé nia hato’o ba jornalista sira.
Foin lalais Primeiru Ministru Kay Rala Xanana Gusmao deklara nia pesoalmente sei apoiu feto hodi kompete iha eleisaun Prezidensiál.

(eme)

Share it :

Leave a Reply

Your email address will not be published. Required fields are marked *