Korea Súl Interese Dezenvolve Greater Sunrise

Prezidente Repúblika José Ramos-Horta. (Foto: STL/Emerenciana Pinto)

DÍLI, STLTIMORLESTE.com – Prezidente Korea-Súl hatudu interese atu partisipa iha dezenvolvimentu projetu gás Greater Sunrise, ne’ebé Timor-Leste konsidera nu’udar projetu estratéjiku nasionál.

Prezidente Repúblika José Ramos-Horta hato’o informasaun ne’e ba jornalista sira, iha Aeroportu Internasionál Prezidente Nicolau Lobato, Bairru Pité, Dili, Tersa (17/11/2026).

Ramos-Horta afirma katak, interese Korea-Súl nian sai rezultadu importante hosi vizita estadu ofisiál ne’ebé nia hala’o iha nasaun ne’e.

Durante vizita ne’e, Prezidente Ramos-Horta hasoru malu ho Prezidente Korea-Súl, hodi hametin relasaun diplomátika no buka oportunidade foun ba kooperasaun estratéjika entre nasaun rua.

Enkontru lider na’in-rua nian mós sai oportunidade atu diskute kona-ba dezenvolvimentu ekonómiku, edukasaun, investimentu no kooperasaun iha setór enerjia.

“Importante atu ko’alia ho Primeiru-Ministru kona-ba oinsá Korea-Súl bele partisipa iha dezenvolvimentu Greater Sunrise,” Prezidente Ramos-Horta dehan.

Nia esplika katak, Korea-Súl depende totalmente ba importasaun enerjia, tanba nasaun ne’e la iha produsaun enerjia suficiente atu satisfás nia nesesidade.

Tuir Ramos-Horta, Korea-Súl sei estuda hamutuk ho Timor GAP no Governu Timor-Leste kona-ba posibilidade atu partisipa iha projetu Greater Sunrise.

Nia konsidera katak, Korea-Súl nia partisipasaun bele aumenta kredibilidade no hametin konfiansa internasionál ba dezenvolvimentu projetu ne’e.

Prezidente José Ramos-Horta hala’o vizita estadu ofisiál ba Korea-Súl nu’udar parte hosi misaun diplomátika iha nasaun haat, inklui Béljika, Fransa no Emiradu Árabe Unidu.

Iha Korea-Súl, Prezidente mós buka oportunidade atu aumenta bolsa estudu ba estudante Timoroan sira no hametin protesaun ba traballadór Timoroan na’in-7.000 ne’ebé servisu iha nasaun ne’e.

Hafoin remata vizita iha Korea-Súl, Prezidente kontinua ba Bruxelas, Béljika, atu partisipa iha konferénsia parlamentár OACPS-Uniaun Europeia.

Nia mós vizita Fransa no Emiradu Árabe Unidu, hodi hametin relasaun bilaterál, parseria estratéjika no oportunidade investimentu ba Timor-Leste.

(eme)

Share it :

Leave a Reply

Your email address will not be published. Required fields are marked *