Maromak Konfia Talentu ba Ema Ida-idak

Ilustrasaun (Foto: Espesial)

DÍLI, STLTIMORLESTE.com – Refleksaun Tersa, 17 Novembru 2026, konvida fiéis atu uza ho responsabilidade talentu no prezente ne’ebé simu husi Maromak.

Padre Paul Kerans SVD ba STL, Tersa (17/11/2026), iha refleksaun bazeia ba Evanjellu Mateus 25:14-30, Pe. Paul Kerans, SVD, esplika katak Maromak fó talentu no responsabilidade ba ema ida-idak, tuir kapasidade, atu dezenvolve no fó benefísiu ba ema seluk.

Padre Paul esplika katak, iha ai-knanoik kona-ba talentu, na’in fó talentu lima ba atan ida, rua ba atan seluk no ida ba atan datoluk, tuir ida-idak nia kapasidade.

Atan na’in rua dahuluk uza talentu ne’ebé sira simu atu produz tan talentu seluk. Maski rezultadu la hanesan, sira simu apresiasaun hanesan tanba hatudu fiar, responsabilidade no badinas.

Na’in fó apresiasaun ba sira ho liafuan: “Di’ak, ha’u nia atan di’ak no fiel! Ita-boot fiel iha buat ki’ik ida; ha’u sei fó responsabilidade ba ita-boot ba buat barak.” dehan Padre.

Maibé atan datoluk hakoi talentu ne’ebé nia simu, tanba nia tauk na’in. Padre Paul hateten katak sala atan ne’e la’ós de’it buat aat ne’ebé nia halo, maibé mós buat di’ak ne’ebé nia tenke halo, maibé la halo.

Reflesaun ne’e mós subliña katak talentu ida iha valor boot tebes. Iha tempu bíbliku, talentu ida reprezenta osan ho valór aas, ne’ebé hatudu fiar boot ne’ebé na’in fó ba atan sira.

Padre Paul refere mós ba hanorin Amu-Papa Bento XVI, ne’ebé hatudu katak talentu la’ós de’it abilidade naturál, maibé inklui rikusoin espirituál ne’ebé Maromak fó mai ita.

“Rikusoin espirituál hirak ne’e inklui Maromak nia Liafuan, Batizmu, orasaun, perdua, Eukaristia no Maromak nia Reinu ne’ebé prezente iha ita-nia leet,” katak Padre.

Nia mós aviza katak, ema bele lakon oportunidade atu dezenvolve fiar bainhira iha komprensaun sala kona-ba Maromak, hanesan atan datoluk ne’ebé haree na’in nu’udar mestre ne’ebé maka’as no halo nia tauk.

Tuir hanorin ne’e, sakramentu sira hanesan Batizmu, Eukaristia no Konfirmasaun tenke moris no fó fuan iha ita-nia moris loroloron, la’ós hakoi de’it iha prejuízu no imajen sala kona-ba Maromak.

Reflesaun ne’e konvida fiéis atu la hakoi talentu no prezente ne’ebé simu husi Maromak, maibé uza ho fiar, domin no responsabilidade atu serbí ema seluk.

(eme)

Share it :

Leave a Reply

Your email address will not be published. Required fields are marked *