Tribunal fó Multa US$ 450 ba Funsionáriu Uza Kareta Estadu

Tribunal Judisial Primeira Instánsia Dili. (Foto: Espesial)

DÍLI, STLTIMORLESTE.com – Tribunal Judisial Primeira Instánsia Dili kondena funsionáriu públiku ida ho multa US$ 450, tanba uza kareta Estadu ba interese família.

Tribunal Judisial Primeira Instánsia Dili iha Tersa-feira, 16 Novembru 2026, kondena arguidu RdA ba krime pekulatu de uzu, ho pena prizaun fulan tolu, ne’ebé substitui ba pena multa US$ 450.

Desizaun ne’e lee husi Juiz Rozito, ho akompañamentu Prokuradór Domingos Gouveia, iha sala julgamentu.

Kazu ne’e kona-ba arguidu ne’ebé uza kareta Estadu hodi lori nia bei-oan ba eskola iha Balide, maski veíkulu ne’e pertense ba Ministériu Interiór.

Durante julgamentu, prova ne’ebé prodús iha tribunal mak deklarasaun arguidu nian. Tribunal konsidera faktu sira ne’ebé imputa ba arguidu provadu hotu.

Tribunal konsidera mós katak arguidu nu’udar funsionáriu públiku ne’ebé asume kargu xefia. Aleinde ne’e, arguidu hatudu arrependimentu ba nia hahalok no la iha antesedente kriminál.

Depois tetu sirkunstánsia sira ne’ebé relevante, tribunal deside aplika pena prizaun fulan tolu, maibé substitui ba pena multa US$ 450.

Tribunal mós husu atu entrega fila fali kareta ne’ebé uza iha kazu ne’e ba Ministériu Interiór nu’udar instituisaun na’in.

Depois lee desizaun, juiz esplika ba arguidu katak, se la konkorda ho desizaun tribunal nian, nia bele halo rekursu liuhusi nia defeza.

(ter)

Share it :

Leave a Reply

Your email address will not be published. Required fields are marked *