DILI, STLTIMORLESTE.com – Prezidente Repúblika (PR), José Ramos-Horta fila mai Timor Leste, hafoin vizita diplomátika iha nasaun haat (4), hodi hametin kooperasaun no investimentu.
Prezidente Repúblika, José Ramos-Horta to’o iha Aeroportu Internasionál Prezidente Nicolau Lobato, Tersa (17/11), hafoin konklui misaun diplomátika iha Korea-Súl, Béljika, Fransa no Emiradu Árabe Unidu (EAU).
Misaun ne’e iha objetivu atu hametin relasaun diplomátika, dezenvolve parseria estratéjika no buka oportunidade foun ba dezenvolvimentu ekonómiku Timor-Leste.
Iha Korea-Súl, Prezidente Ramos-Horta hala’o vizita estadu ofisiál dahuluk, ho rezultadu importante kona-ba edukasaun, traballadór Timoroan no kooperasaun iha setór enerjia.
Enkontru diplomátiku ne’e fó kompromisu atu aumenta kuota edukasionál no bolsa estudu ba estudante Timoroan sira iha universidade Korea-Súl nian.
Prezidente mós hato’o preokupasaun kona-ba bem-estar traballadór Timoroan na’in-7.000 ne’ebé hela no servisu iha Korea-Súl.
Iha setór enerjia, Governu no empreza sira Korea-Súl hatudu interese atu partisipa iha dezenvolvimentu projetu gás Greater Sunrise.
Iha Bruxelas, Béljika, Xefe Estadu partisipa iha Asembleia Parlamentár Paritária Organizasaun Estadu Áfrika, Karaíbas no Pásifiku (OACPS) no Uniaun Europeia (UE).
Atividade ne’e sai oportunidade atu hametin Timor-Leste nia pozisaun diplomátika no relasaun multilaterál ho instituisaun internasionál sira.
Iha Paris, Fransa, Prezidente Ramos-Horta hala’o enkontru bilaterál ho Prezidente Emmanuel Macron, hodi hametin amizade no kooperasaun entre nasaun rua.
Enkontru ne’e marka ho troka kondekorasaun nasionál aas liu entre lider na’in-rua.
Prezidente Macron fó Grã-Cruz da Légion d’honneur ba Ramos-Horta, enkuantu Prezidente Timor-Leste entrega Grande-Colar da Ordem de Timor-Leste ba lider Fransa nian.
Iha Abu Dhabi, EAU, Prezidente Ramos-Horta hala’o enkontru ofisiál ho Prezidente Sheikh Mohamed bin Zayed Al Nahyan, hodi hametin parseria estratéjika entre nasaun rua.
Kooperasaun ne’ebé diskute inklui dezenvolvimentu Greater Sunrise, refinansiamentu kapitál ba Aeroportu Internasionál Prezidente Nicolau Lobato no dezenvolvimentu agrikultura.
Parseria ne’e mós inklui konstrusaun ospitál espesializadu ba kardiolojia no dezenvolvimentu hotel de luxe sira iha Timor-Leste.
Lideransa EAU kompromete atu avansa área kooperasaun hirak-ne’e, ne’ebé sei kontinua liuhosi delegasaun ministeriál lidera hosi Primeiru-Ministru Kay Rala Xanana Gusmão.
Durante vizita iha Abu Dhabi, Prezidente mós vizita kampamentu Dezertu Safari atu observa modelu dezenvolvimentu turizmu bazeia ba kultura tradisionál Beduínu.
Esperiénsia ne’e bele sai referénsia ba Timor-Leste atu dezenvolve turizmu sustentável, promove patrimóniu kulturál no diversifika ekonomia nasionál.
Misaun diplomátika ne’e remata ho kompromisu no oportunidade foun ba kooperasaun internasionál, investimentu no dezenvolvimentu estratéjiku Timor-Leste nian.
(eme)






