AMBENO, STLTIMORLESTE.com – Ministériu Defeza (MD) liuhosi Diresaun Nasionál Polítika Defeza, hala’o sosializasaun no sensibilizasaun ba estudante sira iha Eskola Téknika Vokasionál Palaban (ETVP), kona-ba oportunidade no partisipasaun feto iha vida militar, hodi hasa’e koñesimentu no enkoraja juventude feto sira atu prepara-an ba futuru iha FALINTIL-Forças de Defesa de Timor-Leste (F-FDTL).
Diretor Nasionál Polítika Defeza, Tenente-Koronel Valerio Valente, esplika ba STL, hafoin hala’o atividade sosializasaun iha ETVP, Tersa (17/11/2026), katak objetivu prinsipál husi atividade ne’e mak atu hakbesik Ministério Defeza ho juventude, liuliu estudante feto sira, hodi fó komprensaun kona-ba vida militar no oportunidade atu partisipa iha instituisaun defeza nasaun.
Nia hateten katak, to’o agora, persentajen partisipasaun feto iha vida militar seidauk aas. Tanba ne’e, Ministério Defeza konsidera importante atu hala’o sensibilizasaun diretamente ba juventude iha ambiente edukasaun.
“Objetivu prinsipál husi Ministério Defeza mak atu hakbesik ho juventude, hodi esplika kona-ba vida militar no oinsá feto sira bele partisipa iha instituisaun ne’e. Tanba persentajen partisipasaun feto iha vida militar seidauk aas, ami mai hakbesik estudante sira atu halo sosializasaun no fó informasaun,” Valerio Valente dehan.
Nia hatutan katak, atividade ne’e importante atu estudante feto sira komprende katak sira mós iha oportunidade atu tama no servisu iha F-FDTL, tuir kritériu no rekizitu ne’ebé instituisaun determina.
Liu hosi sensibilizasaun ne’e, estudante sira bele hetan koñesimentu kona-ba realidade vida militar, preparasaun ne’ebé presiza no kapasidade ne’ebé tenke dezenvolve atu bele konkore iha futuru.
Valerio mós enkoraja estudante sira atu uza média sosiál ho responsabilidade, étika no seguru, no tau matan ba saúde fízika no mentál nu’udar parte importante husi preparasaun pesoál.
Nia subliña katak, preparasaun juventude nian la depende de’it ba edukasaun formál iha sala aula, maibé presiza mós dezenvolve kapasidade liuhosi formasaun la formál no partisipasaun iha atividade sosiál.
Vincencio Enkoraja Feto Atu Tama Militar
Iha oportunidade hanesan, Diretor Rejionál Servisu Edukasaun, Vincencio Cono, hato’o apresiasaun ba Ministério Defeza, liuhosi Direção Nasionál Polítika Defeza, tanba hala’o atividade sosializasaun no sensibilizasaun iha área edukasaun, hodi promove partisipasaun feto iha vida militar.
Vincencio enkoraja estudante feto sira atu aproveita oportunidade ne’ebé iha no prepara-an ba futuru, inklui atu servisu iha instituisaun defeza nasaun.
Nia esplika katak, estudante sira iha dalan edukasaun no profisionál oioin. Estudante balun bele kontinua estudu ba ensinu superior iha universidade, enkuantu sira seluk bele hili profisaun iha área militar ka polísia, tuir sira-nia interese no preparasaun.
Vincencio enfatiza katak, tama ba F-FDTL la’ós de’it atu buka kargu, maibé tenke konsidera nu’udar profisaun ne’ebé presiza responsabilidade, disiplina no kompromisu atu serví nasaun.
Nia kompara katak, hanesan profesór ne’ebé hala’o knaar hanorin nu’udar profisaun, membru militar sira mós iha responsabilidade profisionál atu kumpre knaar iha defeza no seguransa nasaun.
Aleinde ne’e, nia enkoraja estudante sira atu dezenvolve kultura lee no buka informasaun pozitivu liuhosi média sosiál, inklui informasaun kona-ba knaar no atividade instituisaun Estadu.
Nia observa katak, utilizadór média sosiál balun fó atensaun boot ba publikasaun kona-ba aniversáriu no eventu pesoál, maibé menus interese atu lee no komprende informasaun importante kona-ba servisu instituisaun sira.
Tanba ne’e, nia konsidera katak estudante sira presiza dezenvolve kapasidade atu asesu, lee no komprende informasaun ho kle’an, hodi sai sidadaun ne’ebé iha koñesimentu no responsabilidade.
Vincencio hein katak, liuhosi atividade sosializasaun ne’e, estudante feto sira bele komprende di’ak liután oportunidade ne’ebé iha no partisipa ativu iha preparasaun ba futuru, inklui oportunidade atu serví iha F-FDTL.
ETVP Hametin Preparasaun Estudante ba Futuru
Iha parte seluk, Diretor Eskola Téknika Vokasionál Palaban (ETVP), José António Oki, konsidera atividade sosializasaun kona-ba partisipasaun feto iha vida militar importante tebes, tanba bele fó informasaun no enkorajamentu ba estudante sira atu prepara-an ba futuru.
Nia hateten katak, liu hosi atividade ne’e, estudante sira bele komprende oportunidade no responsabilidade iha vida militar, inklui preparasaun fízika, saúde no kapasidade pesoál ne’ebé presiza atu bele konkore tama iha F-FDTL.
“Importante tebes estudante sira prepara-an, tau matan ba saúde no dezenvolve sira-nia kapasidade, atu iha futuru bele konkore tama iha F-FDTL,” José António Oki esplika.
Nia mós enkoraja estudante sira atu uza média sosiál ho responsabilidade, étika no seguru, tanba utilizasaun média sosiál ne’ebé apropriadu bele ajuda dezenvolve koñesimentu no kapasidade juventude nian.
(jos)






