MANILA, STLTIMORLESTE.com – Primeiru-Ministru Singapura, Lawrence Wong, manifesta apoiu ba Timor-Leste atu asume prezidénsia ASEAN iha tinan 2029, depois tama nu’udar membru organizasaun rejionál ne’e.
Wong hato’o deklarasaun ne’e durante nia diskursu iha East Asia Summit (EAS), iha Philippines International Convention Center (PICC), Manila, Filipinas, Tersa-feira (17/11/2026).
Nia afirma katak, durante prezidénsia Filipinas nian iha tinan 2026, ASEAN hasoru dezafiu oioin, tantu iha rejiaun hanesan mós mundu tomak.
Maski nune’e, iha lideransa Filipinas nian, ASEAN kontinua hamutuk, mantein unidade no avansa ho ambisaun no objetivu klaru.
Wong mós destaka progresu importante sira, inklui asinatura Akordu Kuadru Ekonomia Dijitál (Digital Economy Framework Agreement).
Aleinde ne’e, ASEAN konsege asegura katak Akordu Komérsiu Merkadoria ASEAN ne’ebé atualizadu no Akordu Komérsiu Livre ASEAN-Xina 3.0 tama iha vigór sedu liu.
Nia mós subliña integrasaun kompleta Timor-Leste ba família ASEAN no manifesta esperansa atu haree nasaun ne’e lidera organizasaun rejionál iha 2029.
“Ita avansa integrasaun kompleta Timor-Leste ba família ASEAN. Primeiru-Ministru Xanana Gusmão, ami hotu hein ho kontente atu haree Timor-Leste asume prezidénsia ASEAN iha tinan 2029,” dehan Lawrence Wong.
Iha sorin seluk, Prezidente Indonézia, Prabowo Subianto, mós reafirma apoiu tomak ba aspirasaun Timor-Leste atu asume prezidénsia ASEAN iha 2029.
“Indonézia apoia tomak aspirasaun Timor-Leste atu asume prezidénsia ASEAN iha 2029,” afirma Prezidente Prabowo.
Nia konsidera katak nasaun membru ASEAN hotu iha kapasidade atu lidera rejiaun no merese konfiansa hosi membru sira seluk.
Prabowo mós fiar katak, susesu Timor-Leste iha ezekusaun prezidénsia ba dala uluk sei sai susesu hamutuk ba ASEAN.
“Susesu iha ezekusaun prezidénsia ba dala uluk sei sai susesu hamutuk ba ASEAN,” dehan Prabowo.
Iha enkontru ne’e, Prabowo mós ko’alia kona-ba momentu istóriku ASEAN, ho introdusaun símbolu vizuál foun organizasaun ne’e.
Atualizasaun símbolu feixe hare ASEAN hosi feixe hare sanulu ba sanulu resin ida reprezenta entrada Timor-Leste nu’udar membru foun organizasaun rejionál Sudeste Aziátika.
Maske hetan apoiu hosi Singapura no Indonézia, Timor-Leste kontinua enfrenta preparasaun importante atu asume responsabilidade prezidénsia ASEAN iha 2029.
Preparasaun hirak-ne’e inklui dezenvolvimentu infraestrutura, alojamentu ho padraun internasionál, konektividade transportes, rede telekomunikasaun, orsamentu no rekursu umanu.
Aspetu hirak-ne’e sai prioridade atu asegura Timor-Leste iha kapasidade institusionál no rekursu sufisiente hodi hala’o responsabilidade prezidénsia ASEAN iha tinan 2029.
(jen)






