Horta Ensera Dili International Trade Expo

Foto: STL/Emerenciana Pinto

DILI, STLTIMORLESTE.com – Prezidente Repúblika (PR), José Ramos-Horta ensera Dili International Trade Expo 2026, iha CCD, Merkadu Lama.

Prezidente Repúblika, José Ramos-Horta liu husi nia diskursu iha CCD, Kuarta kalan (18/11/2026) hato’o agradese ba Governu, liuhusi Ministru Filipus Nino Pereira no ekipa organizadora, tanba susesu organiza Dili International Trade Expo 2026.

Horta dehan, eventu ne’e reprezenta plataforma importante atu hametin negósiu, promove investimentu no loke oportunidade komersiál foun ba empreza timoroan sira.

“Dili International Trade Expo 2026 aprezenta vizaun ida kona-ba dezenvolvimentu ne’ebé ami hakuak ho determinasaun,” dehan PR Horta.

Prezidente hateten katak, Timor-Leste presiza dezenvolve ekonomia diversifikada, produtiva, reziliente no sustentável, atu kria empregu no aumenta rendimentu família sira.

Nia esplika katak, rekursu naturál iha limite, maibé rikusoin prinsipál Timor-Leste nian mak talentu, kreatividade, servisu maka’as no espíritu empreendedór povu nian.

Horta mós destaka importánsia setór privadu nian nu’udar motór prinsipál ba kresimentu ekonómiku nasionál no kriasaun oportunidade ba sidadaun sira.

Nia afirma katak, enkontru negósiu, business matching, aprezentasaun oportunidade investimentu no asinatura Memorandu Entendimentu bele transforma ideia sira ba projetu konkretu.

Prezidente husu atu rezultadu eventu ne’e la limita de’it ba dokumentu, maibé transforma ba investimentu efetivu, empreza foun, empregu no transferénsia koñesimentu.

Horta subliña katak, susesu expo nian tenke sukat hosi parseria konkretu, investimentu ne’ebé realiza, empregu ne’ebé kria no merkadu foun ne’ebé asesu.

Iha nia diskursu ikus, Horta hato’o agradese ba organizadór, partisipante, investidór no parseiru internasionál sira, antes deklara ofisialmente taka edisaun daruak Dili International Trade Expo 2026.

Partisipante iha eventu ne’e husi Prezidente Republika no Filipus Nino Pereira, Ministru Komérsiu no Indústria, Membru Governu sira, reprezentante sira husi Korpu Diplomátiku no organizasaun internasionál sira.

Distintu reprezentante sira hosi país partisipante sira, emprezáriu sira, investidór sira no parseiru komersiál sira. Reprezentante sira hosi kámara komérsiu, instituisaun finanseira sira, universidade sira no setór privadu.

(eme)

Share it :

Leave a Reply

Your email address will not be published. Required fields are marked *