DÍLI, STLTIMORLESTE.com – Maski Timor-Leste (TL) ukun aan liu tinan 20, infraestrutura menus kontinua sai obstákulu ba dezenvolvimentu no moris di’ak komunidade iha nasaun.
Preokupasaun ne’e hato’o husi Pro-Reitor Asuntu Kooperasaun Universidade Nasionál Timor Lorosa’e (UNTL), Cristóvão dos Reis, ba STL iha Delta Nova, kuarta (18/11/2026).
Nia esplika katak, dezenvolvimentu infraestrutura iha Timor-Leste kontinua lao, maski seidauk konsege atinji nesesidade iha territóriu tomak.
Maibé, iha Dili no estrada nasionál sira ne’ebé liga munisípiu ida ho munisípiu seluk, Governu halo ona esforsu atu hadi’a konektividade, nune’e komunidade bele hala’o atividade ekonómika no hadi’a sira-nia moris loroloron.
“Klaru katak dezenvolvimentu lao, maibé neineik, tanba maski ita ukun aan liu ona tinan 20, to’o ohin loron ita sei hasoru dezafiu barak.
Infraestrutura hanesan estrada, bee-moos, eletrisidade, edukasaun no saúde sei menus,” nia dehan.
Nia aumenta katak, infraestrutura iha setór edukasaun mós seidauk sufisiente, tanba eskola balun sei falta kadeira no meza, inklui mós infraestrutura bázika seluk. Aleinde ne’e, rekursu umanu seidauk adekuadu atu responde ba nesesidade populasaun Timor-Leste.
Tanba ne’e, nia husu atu Governu tau atensaun boot ba dezenvolvimentu infraestrutura no rekursu umanu, hodi garante dezenvolvimentu ne’ebé bele lori benefísiu ba povu tomak.
Nia mós enfatiza katak, membru Governu sira tenke hala’o servisu ho profesionalizmu, responsabilidade no seriedade, la haree tanba diferensa kor polítika ka afiliasaun partidária.
“Dezenvolvimentu nasaun nian labele haree ba kor partidu.
Ita hotu hetan konfiansa atu hala’o responsabilidade hanesan ministru ka sekretáriu Estadu ba nasaun, la’ós ba partidu. Tanba ne’e, tenke hala’o servisu ho profesionalizmu, hatudu kapasidade no seriedade iha dezenvolvimentu ita-nia rai,” nia afirma.
Cristóvão dos Reis mós fó ezemplu estrada iha munisípiu balun ne’ebé seidauk hetan hadi’ak, hanesan estrada husi Gleno ba Atsabe, Ermera.
Maski Governu Konstitusionál IX hala’o ona serimónia lansamentu ba projetu estrada sira, nia espera katak projetu hirak ne’e la’ós lansamentu de’it, maibé tenke iha implementasaun efetiva.
Nia lembra katak, iha Governu Konstitusionál VIII, projetu infraestrutura barak hetan lansamentu, maibé balun la kontinua bainhira Governu Konstitusionál IX hahú servisu.
Tanba ne’e, nia espera katak projetu infraestrutura ne’ebé Governu atual halo lansamentu bele hahú no remata lalais, antes mandatu Governu nian remata, atu evita projetu hirak ne’e sai responsabilidade ba Governu foun iha futuru.
(joa)






