DILI, STLTIMORLESTE.com – Prezidente Republika (PR), José Ramos-Horta afirma, empreendedór mikro ki’ik no médiu sira nu’udar baze importante ba ekonomia Timor-Leste (TL).
Prezidente Repúblika José Ramos-Horta hato’o mensajen ba empreendedór no joven timoroan sira durante serimónia taka Dili International Trade Expo 2026, iha CCD, Merkadu Lama.
Horta afirma katak, empreendedór sira, inklui komersiante, agrikultór, peskadór, artezaun no fabrikante ki’ik, kontribui diretamente ba sustentasaun família no dezenvolvimentu komunidade.
“Ita-boot sira maka ruin kotuk ba ita-nia ekonomia.” dehan Prezidente Republika Jose Ramos Horta.
Prezidente husu emprezáriu timoroan sira atu aumenta produtu ho marka Made in Timor-Leste, hodi promove produtu nasionál iha merkadu lokál no internasionál.
Nia fó ezemplu kafé timoroan ne’ebé hetan rekoñesimentu internasionál tanba kualidade no karakterístika úniku.
Horta mós identifika oportunidade dezenvolvimentu iha agrikultura, produsaun ai-han, peska, prosesamentu produtu agríkola, turizmu, artezanatu, konstrusaun no teknolojia.
Prezidente dehan, objetivu prinsipál mak aumenta produsaun, kria valór iha rai-laran no asegura katak benefísiu ekonómiku barak liu hela iha povu Timor-Leste nia liman.
Atu atinji objetivu ne’e, Horta konsidera katak empreza sira presiza asesu di’ak liu ba finansiamentu, formasaun profisionál, teknolojia, informasaun merkadu no rede distribuisaun.
Nia mós subliña importánsia preparasaun empreza nasionál sira atu aproveita oportunidade komérsiu iha ASEAN no merkadu internasionál.
Horta husu atu hadi’a infraestrutura, transporte, lojístika no konetividade dijitál, hodi kria ambiente negósiu transparente no favorável ba investimentu.
(eme)






