DILI, STLTIMORLESTE.com – Prezidente José Ramos-Horta husu Governu no setór privadu atu servisu hamutuk prepara Timor-Leste ba kompetisaun ekonómika global.
Prezidente Repúblika José Ramos-Horta hato’o apelu ne’e durante serimónia taka Dili International Trade Expo 2026, iha CCD, Merkadu Lama, Kuarta kalan (18/11/2026).
Horta afirma katak, Governu, setór privadu no instituisaun ensinu tenke hametin kooperasaun atu prepara Timor-Leste ba partisipasaun kompetitiva iha ekonomia rejionál no global.
“Ekonomia ida ne’ebé forte la’ós harii de’it iha kapitál, infraestrutura no komérsiu.” dehan Prezidente Horta.
Prezidente esplika katak, dezenvolvimentu ekonómiku depende mós ba rekursu umanu ne’ebé iha kualifikasaun, saúde di’ak, kreatividade no motivasaun.
Nia husu atu kria oportunidade ekonómika ba agrikultór Ermera, peskadór Manatuto, produtór kafé Aileu, artezaun Baucau no empreendedór joven Díli.
Horta hateten katak, dezenvolvimentu setór privadu tenke akompaña ho redusaun pobreza, hadi’a edukasaun, hametin saúde públika no hadi’a kondisaun moris povu nian.
Ba investidór internasionál sira, Prezidente konvida atu haree Timor-Leste nu’udar nasaun ho potensiál kresimentu, populasaun joven no lokalizasaun jeográfika estratéjika.
Nia mós enkoraja investidór sira atu estabelese parseria ho empreza timoroan, fahe koñesimentu no teknolojia, no kontribui ba dezenvolvimentu kapasidade nasionál.
Horta afirma katak, parseria ekonómika tenke fó benefísiu ba investidór, empreza nasionál, traballadór no povu Timor-Leste.
Prezidente mós lembra katak susesu Dili International Trade Expo sei sukat hosi investimentu konkretu, parseria, kriasaun empregu no asesu ba merkadu foun.
(eme)






