Ramos-Horta ho Durreen Diskute Lideransa TL no ASEAN

DILI, STLTIMORLESTE.com – Prezidente Republika (PR), José Ramos-Horta hasoru fundadora IIX, Durreen Shahnaz, diskute lideransa Timor-Leste iha ASEAN no investimentu ho impaktu.

Prezidente Repúblika José Ramos-Horta simu Fundadora no Diretora Ezekutiva husi Impact Investment Exchange (IIX), Durreen Shahnaz, iha audiénsia kortezia iha Palásiu Prezidensiál Nicolau Lobato, Bairru Pité, Dili, Kuarta-feira (18/11).

Enkontru ne’e foka ba dezenvolvimentu sustentável, integrasaun rejionál no preparasaun Timor-Leste atu asume lideransa rejionál, inklui knaar nu’udar Prezidente ASEAN iha 2029.

Durante diskusaun, sira mós aborda oportunidade atu mobiliza investimentu ho impaktu hodi promove dezenvolvimentu ekonómiku inkluzivu no hadi’a moris povu Timor-Leste.

Hafoin enkontru, Durreen Shahnaz ba jornalista hato’o nia apresiasaun ba Prezidente Ramos-Horta nia vizaun kona-ba kriasaun sosiedade ne’ebé ekitativa no justu.

“IIX prontu atu kolabora ativu ho Timor-Leste hodi mobiliza investimentu ho impaktu no kria oportunidade ekonómika inkluziva ba povu Timor-Leste.” dehan Durreen Shahnaz.

Shahnaz afirma katak IIX sei kontinua buka dalan kolaborasaun ho Timor-Leste atu apoia dezenvolvimentu sustentável no kria benefísiu ekonómiku ne’ebé bele asesu husi parte hotu iha sosiedade.

(eme)

Share it :

Leave a Reply

Your email address will not be published. Required fields are marked *