Autoridade RAEOA Sei Realiza Eventu Boxing, Atleta Oecusse-Dili

AMBENO, STLTIMORLESTE.com – Autoridade Rejiaun Administrativa Espesiál Oecusse-Ambeno (RAEOA) sei realiza kompetisaun boxing entre atleta hosi Oecusse no Dili atu promove dezenvolvimentu desportu, identifika talentu foun no prepara joven sira atu bele kompete iha nivel nasionál no internasionál.

Prezidente Autoridade RAEOA, Regio da Cruz Salu, hateten ba STL iha Salaun Gabinete Autoridade RAEOA, hafoin simu reprezentante no atleta boxing sira, Kuarta (18/11/2026), katak nia apoia inisiativa ne’e tanba bele kria oportunidade ba joven sira atu dezenvolve kapasidade, abilidade no esperiénsia liuhusi kompetisaun desportiva.

Nia esplika katak, inisiativa ne’ebé Revolta Boxing Club organiza la’ós atu promove de’it modalidade boxing, maibé mós atu dezenvolve desportu no identifika atleta ho poténsia atu avansa ba nivel profisionál.

Tuir Regio da Cruz Salu, kompetisaun boxing entre Munisípiu Oecusse no Dili ne’e mós integra iha programa komemorasaun tinan 51 Proklamasaun Unilateral Independénsia Timor-Leste, atu fó oportunidade ba atleta sira hatudu sira-nia kapasidade no talentu iha públiku nia oin.

Nia konsidera katak, atividade desportiva hanesan ne’e bele ajuda joven sira hasa’e esperiénsia, disiplina, korajen no konfiansa-an, nu’udar preparasaun ba sira-nia futuru iha mundu desportivu.

Prezidente Autoridade RAEOA mós hein katak, apoiu ba klubu boxing sira bele sai motivasaun ba joven seluk atu envolve an iha atividade desportiva, dezenvolve sira-nia talentu no iha oportunidade atu reprezenta Oecusse no Timor-Leste iha kompetisaun futuru.

Iha oportunidade ne’e, Koordenadór Revolta Boxing Club, Xandre Serano, hateten katak organizasaun prepara kompetisaun ho naran Municipal Boxing Battle, ne’ebé sei envolve atleta na’in 20, inklui na’in 10 hosi RAEOA no na’in 10 hosi Munisípiu Dili.

Nia esplika katak, atleta sira ne’e mai hosi klubu boxing oioin, ho objetivu atu kompete, troka esperiénsia no hatudu sira-nia kapasidade iha modalidade boxing.

Xandre Serano hateten katak, planu inisiál ba kompetisaun ne’e hahú ona hosi fulan Setembru ho konseitu kompetisaun entre munisípiu sira. Maibé, hafoin iha komunikasaun no proposta hosi Prezidente Autoridade RAEOA, organizadór deside atu realiza eventu ne’e iha Oecusse.

Nia hato’o apresiasaun ba Prezidente Autoridade RAEOA tanba fó apoiu ba realizasaun kompetisaun, inklui fasilita akomodasaun ba ekipa atleta sira durante sira-nia estadia iha Oecusse.

Tuir Xandre, realizasaun kompetisaun ne’e iha Oecusse mós nu’udar parte hosi atividade sira atu selebra Loron Proklamasaun Independénsia, 28 Novembru, no loke oportunidade ba komunidade atu asiste diretamente kompetisaun boxing.

Nia afirma katak, eventu ne’e sei loke ba públiku, atu komunidade Oecusse bele fó apoiu ba atleta sira ne’ebé reprezenta munisípiu ida-idak, no mós motiva joven sira atu dezenvolve interese iha modalidade boxing.

Xandre aumenta katak, kompetisaun ne’e sei hala’o tuir kalendáriu organizadór nian, ho etapa sira ne’ebé sei kontinua kada semana rua, molok to’o ba etapa final ne’ebé prevista atu realiza iha 18 Dezembru 2026.

Organizadór hein katak, Municipal Boxing Battle bele sai plataforma ida atu promove desportu, hasa’e partisipasaun joven no dezenvolve atleta boxing sira iha Oecusse no Timor-Leste tomak.

(jos)

Share it :

Leave a Reply

Your email address will not be published. Required fields are marked *